Sunday, January 23, 2022
No menu items!
Homeमहाराष्ट्रराज ठाकरेंकडून जातीय राजकारणाचा आरोप; राष्ट्रवादीचं सडेतोड उत्तर

राज ठाकरेंकडून जातीय राजकारणाचा आरोप; राष्ट्रवादीचं सडेतोड उत्तर

मुंबई (रिपोर्टर):- राष्ट्रवादी काँग्रेसनंच राज्याच्या राजकारणात जातीय अस्मितेचा मुद्दा मोठा केल्याचा आरोप महाराष्ट्र नवनिर्माण सेनेचे अध्यक्ष राज ठाकरे यांनी काल केला होता. राज ठाकरे यांच्या या आरोपाला राष्ट्रवादी काँग्रेसनं सडेतोड उत्तर दिलं आहे. ’राज ठाकरे यांना जातीव्यवस्थेचा इतिहास माहीत नसावा म्हणून ते अशा प्रकारचं वक्तव्य करत आहे,’ असा टोला राष्ट्रवादीनं हाणला आहे.
एका वृत्तवाहिनीला दिलेल्या मुलाखतीत राज ठाकरे हे राज्याच्या राजकारणातील जात या फॅक्टरबद्दल रोखठोक बोलले होते. या मुद्द्यावर बोलताना राज यांनी राष्ट्रवादी काँग्रेसवर थेट आरोप केले. ’महाराष्ट्रात जात ही गोष्ट आधीपासूनच होती. मात्र, स्वजातीचा अभिमान इतपतच ती मर्यादित होती. आत मात्र जात ही नेत्यांची ओळख झाली आहे. महाराष्ट्रात राष्ट्रवादी काँग्रेसच्या जन्मानंतरच जातीचा मुद्दा हा सर्वार्थाने मोठा झाला आहे. जेम्स लेनला मराठा तरुण-तरुणींपर्यंत कुणी पोहोचवलं?,’ असा प्रश्‍नही राज यांनी उपस्थित केला होता.
राष्ट्रवादी काँग्रेसचे प्रवक्ते नवाब मलिक यांनी राज ठाकरे यांच्या आरोपांना उत्तर दिलं आहे. ’राष्ट्रवादी काँग्रेस हा शाहू-फुले-आंबेडकरांच्या विचारांवर चालणारा पक्ष आहे. त्यांच्या ठरलेल्या धोरणानुसार आम्ही राजकारण करतो. राज ठाकरे यांना हे माहीत नसावे किंवा जातीव्यवस्थेचा इतिहास माहीत नसावा म्हणून ते अशा प्रकारचं वक्तव्य करत आहे,’ असं मलिक म्हणाले.
’या देशात मनुवादी व्यवस्थेमुळं वर्णव्यवस्था निर्माण झाली आणि त्या अंतर्गत जातीव्यवस्था उभ्या राहिल्या. त्यातून जातीचा आधार घेत अनेक वर्षे लोकांवर अन्याय होत राहिला, हे राज ठाकरे यांना बहुतेक माहीत नसावं. छत्रपती शाहू महाराज, महात्मा फुले, डॉ. बाबासाहेब आंबेडकर या महामानवांनी जातीव्यवस्था नष्ट करण्याचं काम केलं. समता मूलक समाज घडवण्याचं काम केलं हेही राज ठाकरे यांना माहीत नसावं. त्या अज्ञानातून राज ठाकरे यांनी हे वक्तव्य केलं असावं,’ असा चिमटाही मलिक यांनी काढला.

Most Popular

error: Content is protected !!