बीड (रिपोर्टर): शहरातील नवी भाजी मंडई भागातील भारत सॉ मिलशेजारी एका फ्रूट गोडाऊनमध्ये मंगळवारी (दि.5) पहाटेच्या सुमारास 5.30 वाजता अज्ञात कारणावरून भीषण आग लागली. या आगीत व्यापार्‍यांचे लाखो रुपयांचे नुकसान झाले आहे. या घटनेची माहिती मिळताच युवा नेते डॉ.योगेश क्षीरसागर यांनी घटनास्थळी धाव घेतली.
समीर बागवान, युनूस बागवान, अकबर बागवान या व्यापार्‍यांचे नवी भाजी मंडई भागात फ्रूट गोडाऊन आहेत. या गोडाऊनला अज्ञात कारणावरून आग लागली. गोडाऊनमधील कागदी पुठ्ठे, बारदाना यामुळे आगीने अधिकच पेट घेतला. ही आग रोखण्यासाठी अग्निशामक विभागाचे पथक पाचारण करण्यात आले. आग आटोक्यात आणली, परंतु, आगीत मोठे नुकसान झाले आहे.
ही आग रोखण्यासाठी नगरसेवक इकबाल शेख, आडत मार्केटचे अध्यक्ष जुबेर बागवान, हाशम बागवान, शेख जलील, शारेक जकेरिया शेख इम्रान, शेख रेहान यांच्यासह स्थानिक नागरिकांनी प्रयत्न केले. दरम्यान, घटनेची माहिती मिळताच डॉ.योगेश क्षीरसागर यांनी घटनास्थळी धाव घेतली. यावेळी त्यांनी पंचनामा करण्यासाठी प्रशासनाला कळविले जाईल. नुकसानग्रस्त व्यापार्‍यांना मदत मिळवून देण्यासाठी शासनाकडे पाठपुरावा करणार असल्याचे आश्वासन दिले.
