उभ्या ट्रकवर ट्रक आदळला एक ठार, एक गंभीर

बीड बायपासवर पहाटे तीन वाजता घडली घटना
बीड (रिपोर्टर) कांदा घेऊन जाणारा ट्रक पंक्चर झाल्याने तो रस्त्याच्या कडेला उभा करून पंक्चर काढत असताना पाठीमागून भरधाव वेगात आलेल्या फरशी घेऊन जाणार्‍या ट्रकने जोराची धडक दिली. या अपघातात एक जण जागीच ठार झाला तर एक गंभीर जखमी झाल्याची घटना बीड बायपासवरील इमामपूर उड्डाणपुलावर आज पहाटे घडली.
पोलिसांनी दिलेल्या माहितीनुसार ट्रक (क्र. ए.पी. 29-टीबी-1479) कांदे घेऊन बीडकडून गेवराईकडे जात होता. या वेळी बीड बायपासवरील इमामपूर उड्डाणपुलावर हा ट्रक पंक्चर झाल्याने चालकाने तो बाजुला घेऊन पंक्चर काढण्यासाठी उभा केला असता पाठीमागून भरधाव वेगात आलेला ट्रक (क्र जी.जे. 25 यु-5545) याने जोराची धडक दिली. या अपघातात कांदा घेऊन जाणार्‍या ट्रकचा चालक अमजद नजीर शेख (वय 36 वर्षे, रा.मरियाल गुडा जि. नलगोंडा रा. तेलंगा) हा जागीच ठार झाला तर अझहर जहिरोद्दीन मोहम्मद (वय 24 वर्षे) हा जखमी झाला आहे. या अपघाताची माहिती बीड ग्रामीण पोलिसांना मिळताच घटनास्थळी पोलीस निरीक्षक संतोष साबळे, स.पो.नि. योगेश उबाळे, पो.हवालदार पी.टी. चव्जहाण, आनंद मस्के, खय्युम खान, पोलीस नाईक राऊत, पो.कॉ. रवी सानप, होमगार्ड सय्यद, शिंदे यांनी घटनास्थळी भेट देऊन जखमीला तात्काळ जिल्हा रुग्णालयात दाखल केले व रस्त्यावरील वाहने बाजुला काढून वाहतूक सुरळीत केली.