सरचिटणीस आ. चव्हाण तर उपाध्यक्ष म्हणून अमरसिंह पंडित यांची पुन्हा निवड
बीड (रिपोर्टर): मराठवाडा शिक्षण प्रसारक मंडळाच्या पंचवार्षिक निवडणुकीसाठी आज औरंगाबाद येथे बैठक आयोजीत करण्यात आली होती. या बैठकीमध्ये सर्वानुमते आ. प्रकाश सोळंके यांची अध्यक्षपदी निवड करण्यात आली तर सरचिटणीस म्हणून आ. सतीश चव्हाण व उपाध्यक्ष अमरसिंह पंडित यांची नियुक्ती करण्यात आली आहे.
मराठवाडा शिक्षण प्रसारक मंडळाच्या पंचवार्षिक निवडणुकीबाबत गेल्या काही दिवसांपासून चर्चा सुरू होती. या शिक्षण प्रसारक मंडळावर पुर्वीपासूनच राष्ट्रवादी काँग्रेस पक्षाचे वर्चस्व राहिलेले आहे. मंडळातील वादाबाबत शरद पवार यांनी मध्यस्थी केल्यानंतर आज मंडळाच्या निवडी बिनविरोध जाहीर करण्यात आल्या. निवडीसाठी औरंगाबाद येथील देवगिरी महाविद्यालयामध्ये बैठक आयोजित करण्यात आली होती. या बैठकीत अध्यक्षपदी आ. प्रकाश सोळंके, सरचिटणीसपदी तिसर्‍यांदा आ. सतीश चव्हाण तर पुन्हा उपाध्यक्ष म्हणून अमरसिंह पंडित, शेख सलीम यांची नियुक्ती करण्यात आली. सहचिटणीस अनिलराव नखाते, प्रभाकर पालोळकर, कोषाध्यक्ष किरण आवरगावकर तर कार्यकारिणी सदस्य म्हणून हेमंतराव जामकर, विवेकानंद भोसले, आप्पासाहेब पाटील, भारत सोळंके, दत्ता पाटील, जयसिंह सोळंके, त्रिंबकराव पाथरीकर, मनाळ भांडवलकर, कल्याण तुपे, विजयकुमार सोळंके, विश्वास येळीकर, मोहनराव सावंत यांची नियुक्ती करण्यात आली आहे.
