पुरुषोत्तमच्या दर्शनासाठी आलेला युवक नदीच्या पाण्यात बुडून बेपत्ता
सकाळी नदीत उतरला होता; शोध कार्य सुरू
माजलगाव (रिपोर्टर): पुरुषोत्तमपुरी येथे पुरुषोत्तम भगवानच्या दर्शनासाठी आलेला भक्त मारुती खवले(वय 45 वर्ष) हा इसम नदीच्या पाण्यात बुडून बेपत्ता झाला.ही घटना शुक्रवार दि.11 रोजी सकाळी 9 वाजता घडली. दरम्यान मंदिर प्रशासनाकडून सदरील बुडालेल्या इसमाचे शोधकार्य सुरू आहे.
अधिक मासानिमित्त माजलगाव तालुक्यातील पुरुषोत्तमपुरी येथे मोठी यात्रा सुरू आहे. त्यानिमित्त माव पाटोदा ता. परतुर जि. जालना येथील इसम मारुती लक्ष्मण खवले (वय 45 वर्ष) भगवान पुरुषोत्तमाच्या दर्शनासाठी आला होता.भगवान पुरुषोत्तमाचे दर्शन करण्यापूर्वी आज सकाळी नऊ वाजता स्नानासाठी तो नदीच्या पाण्यात गेला होता.परंतु बराच वेळ झाला तरी तो वर आला नाही.तो नदीच्या पाण्यात बुडाल्यामुळे त्याची सोबत असणार्‍यांकडून शोधाशोध केली.नंतर मंदिर प्रशासनाकडून ही त्याची शोध मोहीम हाती घेण्यात आली. स्थानिक मछवारे यांच्याकडूनही शोध कार्य सुरू आहे. दरम्यान घटनास्थळी पोलीस प्रशासन, महसूल प्रशासन, माजलगाव नगरपरिषद प्रशासन, दाखल झाली आहेत.
