मुंबई (रिपोर्टर): मुख्यमंत्री एकनाथ शिंदे यांच्या नेतृत्वाखालील शिवसेनेमध्ये गेल्या वर्षभरापासून विविध पक्षांतील पदाधिकार्‍यांचे जोरदार ‘इनकमिंग’ सुरू असताना पहिल्यांदाच शिवसेनेला ‘जय महाराष्ट्र’ करणार्‍या पदाधिकार्‍यांची मोठी यादी समोर आली आहे. स्वत:ला कडवे शिवसैनिक म्हणवून घेणारे रामदास कदम यांचे सुपुत्र सिद्धेश कदम यांच्यामुळे पदाधिकार्‍यांनी राजीनास्त्र उपसल्याची घटना ताजी असतानाच जोगेश्वरीतील शिंदे गटात असंतोष उफाळून आला आहे. शिंदे गटाचे जोगेश्वरी पूर्ण येथील विभाग क्रमांक चारचे प्रमुख विजय धिवार आणि महिला विभागप्रमुख शिल्पा वेले यांच्या छळामुळे आम्हाला आत्महत्या करावी वाटतीये, अशा उद्विग्न भावना शाखा संघटकांनी बोलून दाखवल्या आहेत.
शिवसेनेत फूट पडून आता जवळपास वर्ष होत आले असून, या कालावधीत उद्धव ठाकरे यांच्या गटातील अनेक नगरसेवक व पदाधिकारी शिंदे यांच्या गटात येत आहेत. असे असताना त्यांच्याच पक्षातील कांदिवली, चारकोप, मालाडमधील पदाधिकार्‍यांनी पत्र पाठवून राजीनामा देण्याचा इशारा दिला. त्यानंतर जोगेश्वरीमधला शिवसेना शिंदे गटातील संघर्ष उफाळून आला आहे.
शाखाप्रमुख असलेले प्रकाश शिंदे म्हणाले, विभागप्रमुख विजय धिवार यांची मनमानी आम्ही सहन केली. आमच्या तक्रारी आम्ही वरिष्ठ नेते संजय मोरे, सिद्धेश कदम आणि नरेश म्हस्के यांच्या कानावर घातल्या. पण तरीही विजय धिवार यांची मनमानी सुरूच आहे. त्यामुळे शाखा क्रमांक 77 मधील जवळपास 200 पदाधिकारी तर जोगेश्वरीतील जवळपास 400 पदाधिकारी राजीनाम्याच्या तयारीत आहेत. विभागप्रमुख विजय धिवार यांना पक्षाची कोणतीही चिंता नाही. ते महिलांचा मानसिक छळ करतात. आम्हाला दडपण आलंय. जीव द्यावासा वाटतोय. विभागप्रमुख महिलांशी बोलताना इतक्या घाणेरड्या शब्दांत बोलतायेत की आम्ही शब्दात सांगू शकत नाही. त्यांच्या कामाला कंटाळून आम्ही प्रभागातील महिला राजीनामा देणार आहोत, अशा संतापजनक भावना जोगेश्वरी विधानसभेच्या संघटक सुरेखा सुर्वे यांनी व्यक्त केल्या.
विभागप्रमुख छळतायेत, जीव द्यावा वाटतोय; शिंदेसेनेत भूकंप, 400 जण राजीनाम्याच्या तयारीत
