शरद पवार जिंदाबाज, बदमराव पंडित तुम आगे बढो हम तुम्हारे साथ है ; घोषणांनी गेवराई शहर दणाणले
गेवराई (रिपोर्टर) राष्ट्रवादीचे अध्यक्ष शरद पवार यांची आज बीड येथे स्वाभिमान सभा होत असून बीड जिल्ह्यात आगमन होताच पवार साहेबांनी नेहमीप्रमाणे धकातंत्राचा वापर करत गेवराई येथे शिवसेना नेते माजीमंत्री बदमरावजी पंडित यांच्या निवासस्थानी भेट देऊन अजित पवार गटाला तालुक्यात मोठा धक्का दिला असून बदामराव पंडित यांनीही खा.शरद पवार साहेब यांचे जोरदार स्वागत करून हजारो कार्यकर्त्यांच्या उपस्थितीत जबरदस्त शक्तीप्रदर्शन केले. यावेळी कार्यकर्त्यांनी शरद पवार साहेब जिंदाबाज, जिंदाबाज, बदामराव पंडित तुम आगे बढो अशा जोरदार घोषणाबाजी करत परिसर दणाणून सोडला.
दरम्यान शरद पवार यांचे गेवराई तालुक्यात आगमन होताच राक्षसभुवन फाटा, बागपिंपळगाव फाटा, शहरातील छत्रपती शिवाजी महाराज चौक यासह ईतर ठिकठिकाणच्या कार्यकर्त्यांनी त्यांचे जोरदार स्वागत केले व बदामराव पंडित यांच्या निवासस्थानी आगमन होताच त्यांच्या परिवाराच्या वतीने जोरदार स्वागत करण्यात आले. यानंतर बदामराव पंडित, युध्दाजित पंडित यांच्यासह सर्व परिवाराची 15 मिनिटे बंद दाराआड चर्चा झाल्याचेही सांगण्यात आले. यावेळी त्यांच्या समवेत आ.जितेंद्र आव्हाड, आ.रोहित पवार, आ.अनिल देशमुख, महेबूब शेख, आ.राजेश टोपे, माजी खा.जयसिंग गायकवाड, फौजिया खान, माजी आ.राजेंद्र जगताप, यांच्यासह अनेकांची उपस्थिती होती. शरद पवार यांच्या भेटीने गेवराई तालुक्यात जोरदार चर्चा सुरू असून बदामराव पंडित समर्थकांमध्ये मोठ्या प्रमाणात उत्साह संचारला असून कार्यकर्त्यांनी प्रचंड घोषणाबाजी करत शक्तीप्रदर्शन केले.
