बीड (रिपोर्टर)- गेवराई येथील गोदावरी पात्रातून अवैधरित्या चोरटी वाहतूक करणारे ट्रॅक्टर पोलिसांनी पकडले असून त्यांच्या विरोधात गुन्हा दाखल करण्यात आला आहे. याच वेळी पोलिसांनी एकूण 7 लाख 4 हजाराचा मुद्देमालही जप्त केेलेला आहे.
काल रात्री पोलीस गस्तीवर असताना एका ट्रॅक्टरद्वारे बांधकामाची वाळू 4 हजार रुपये ब्रासप्रमाणे चोरून विकताना ट्रॅक्टरला पकडण्यात आले. ट्रॅक्टर आणि ट्रॅक्टरमधील वाळू जप्त करण्यात आली असून आसाराम सुरेश माळी (रा. बेलगाव ता. गेवराई) याच्या विरोधात भा.दं.वि. 379 अन्वये गुन्हा दाखल करण्यात आलेला आहे. याचा तपास पो.हे.कॉ. श्रीनिवास यादव हे करत आहेत.
बीडमध्ये पोलिसास मारहाण
शहरातील नगर नाका या ठिकाणी ड्युटीवर असलेल्या पोलीस कर्मचारी विष्णू रमेश चव्हाण यांना आरोपी शेख कलीम शेख जमाल याने मारहाण केली. सदरील कर्मचारी ऑल आऊट ऑपरेशन दरम्यान नगर रोडवर नाकाबंदी करत होते. या वेळी त्यांच्या गचुर्‍याला धरून त्यांना मारहाण करण्यात आल्याने आरोपीविरोधात शिवाजीनगर पोलीस ठाण्यात गुन्हा दाखल करण्यात आला आहे.
