शेतात झोपलेल्या वृद्धाची निर्घृण हत्या; केंद्रेवाडीत खळबळ; पोलीस घटनास्थळी सहायक पोलीस अधिक्षकांची भेट

घटनास्थळी श्‍वानपथकाला पाचारण
धारूर (रिपोर्टर) झोपेमध्ये असलेल्या एका वृद्धावर धारदार शस्त्राने वार करून त्याची निर्घृणपणे हत्या करण्यात आल्याचा खळबळजनक प्रकार रात्री घडला आहे. ही घटना अंबाजोगाई तालुक्यातील केेंद्रेवाडी येथे घडली. घटनेची माहिती पोलीस प्रशासनाला झाल्यानंतर पोलिसांनी घटनास्थळी जावून पंचनामा केला. सहायक पोलीस अधिक्षक पंकज कुमावत यांनीही घटनास्थळी जावून पाहणी केली. या खुनाच्या तपासासाठी श्‍वानपथकाला पाचारण करण्यात आले आहे.

धारूर पोलीस स्टेशन हद्दीतील केंद्रेवाडी येथील गिरी वस्तीवरील दत्तात्रय रामभाऊ गायके असे मयताचे नाव असून,6 जून मंगळवारी ते रात्री गिरी वस्ती जवळ असलेल्या स्वतः च्या शेतात झोपण्यासाठी गेले होते. रात्री अंदाजे 12 वाजण्याच्या सुमारास झोपेत असताना त्यांच्यावर अज्ञात व्यक्तीने धारदार शस्त्राने हल्ला करत अनेक वार केले. यावेळी मोठा ओरडण्याचा आवाज आल्याने काहीजण धावत गेले. त्यावेळी एक व्यक्ती तेथून पळून गेलेला दिसून आला. परंतु अंधारामुळे तो कोण होता? ओळखता आले नाही. लोक घटनास्थळी पोचले असता मृतदेह रक्ताच्या थारोळ्यात पडलेला दिसून आला. रात्रीच धारूर पोलीसांना घटनेची माहिती देण्यात आली. माहिती मिळताच धारुर पोलीस स्टेशनचे पोलीस निरीक्षक विजय आटोळे, पोलीस उपनिरीक्षक संतोष भालेराव, पोलीस उपनिरीक्षक गोविंद बास्टे आदि कर्मचार्‍यांसह घटनास्थळी दाखल झाले. घटनास्थळाचा पंचनामा केला. हा प्रकार नेमका काय? कोणी केली हत्या हे फिर्यादीवरून व पोलीस तपासात निष्पन्न होईल. याप्रकरणी गुन्हा दाखल करण्याची प्रक्रिया सुरू आहे.

मयताच्या मुलाचे तीन दिवसावर लग्न;
संशयाची सुई जावयावर
दत्तात्रय गायके यांच्या मुलाचे लग्न अवघ्या तीन दिवसांवर आले होते. लग्नानिमित्त त्यांच्या दोन्ही मुली आणि जावई घरी आले होते. घटनास्थळी जावयाची मोटारसायकल आढळून आली असून घटना घडल्यापासून जावई फरार असल्याने संशयाची सुई जावयावर असल्याची माहिती सूत्रांनी दिली. दरम्यान, कोणत्या कारणास्तव हा खून झाला हे अद्याप निष्पन्न झाले नसून धारूर पोलीस पुढील तपास करत आहे. शवविच्छेदनासाठी मृतदेह सध्या अंबाजोगाईच्या स्वाराती रुग्णालयात हलविण्यात आला आहे.

एएसपी पंकज कुमावत यांची भेट
केंद्रेवाडी येथे हत्या झाल्याची माहिती मिळताच केज उपविभागीय पोलीस अधिकारी कार्यालयाचा पदभार असलेले सहाय्यक पोलीस अधिक्षक पंकज कुमावत यांनी केंद्रेवाडी येथे सात जून बुधवारी सकाळी भेट दिली. याबाबत धारुर पोलीसांना सूचना दिल्या आहेत. त्यावरून तपास करण्यात येत आहे.

ठसे तज्ञ व
श्वानपथक पाचारण
हत्येचा गंभीर प्रकार घडल्याने आरोपीला निष्पन्न करण्यासाठी ठसे तज्ञ व श्वान पथक पाचारण करण्यात आल्याची माहिती सूत्रांनी दिली.