गेवराई तालुक्यात हळहळ
गेवराई (रिपोर्टर) तालुक्यातील युवा नेते तथा गुलमेश्वर गुळ कारखान्याचे अध्यक्ष बापुराव बबनराव चव्हाण (वय वर्ष 42) यांचा शनिवार दि. 5 रोजी सकाळी 9 वाजता र्हृदयविकाराचा तीव्र झटका आल्याने मृत्यू झाला आहे. या घटनेने सहकार क्षेत्राला धक्का बसला असून, जिल्ह्यात हळहळ व्यक्त केली जात आहे.
शनिवार दि. 5 रोजी त्यांना
सकाळी नऊ वाजता छातीत त्रास झाल्याने तातडीने गेवराई च्या सरकारी दवाखान्यात उपचारार्थ दाखल करण्यात आले होते. प्राथमिक उपचारानंतर त्यांना बीडला हलविण्यात आले. मात्र, त्या आधीच त्यांचा मृत्यू झाल्याचे सांगण्यात आले. बापू चव्हाण यांनी अल्पावधीत सहकार क्षेत्रात उल्लेखनीय कार्य करून लोकप्रियता मिळवली होती. सहकारी बॅन्क, दोन गुळ कारखान्याची उभारणी करून गेवराई जि.बीड परिसरात उद्योग व्यावसयात विश्वासार्हता निर्माण केली होती. गोदा पट्यात त्यांना मानणारा वर्ग निर्माण झाला होता. स्वभावाने शांत, संयमी असलेले बापूसाहेब चव्हाण, आबा नावाने ओळखले जात होते. शनिवारी दि. 5 रोजी सायं. सहा वाजता त्यांच्या गुळज ता. गेवराई जि.बीड, या राहत्या गावी त्यांच्यावर अंत्यसंस्कार करण्यात येणार असल्याचे सांगण्यात आले आहे. चव्हाण परिवाराच्या दुःखात सायं.दै.रिपोर्टर परिवार सहभागी आहे.
