न्यायालयाने कलम 307 अंतर्गत ठोठावली शिक्षा
केस केल्याच्या कारणावरून झाला होता हल्ला
बीड (रिपोर्टर): आमच्या विरोधात केस का केली? या कारणावरून चौसाळा येथील नितीन लोढा यांच्यावर प्राणघातक हल्ला झाला होता. या हल्ल्यातील आरोपीला बीड येथील चौथे न्यायालय यांनी दोषी ठरवून कलम 307 अंतर्गत जन्मठेपेची शिक्षा ठोठावून पाच हजार रुपये दंड आकारला आहे.
चेक प्रकरणी नितीन लोढा यांनी रणजीत गुंजाळ याच्या विरोधात 138 नुसार केस केली होती. याचाच राग मनात धरून लोढा यांच्यावर 6-6-2022 रोजी रात्री अकराच्या दरम्यान रणजीत गुंजाळ याने सत्तूरने डोक्यावर वार केल्याने लोढा हे गंभीर जखमी झाले होते. गंभीर अवस्थेत त्यांना बीड येथील रुग्णालयात दाखल करण्यात आले होते. त्यानंतर औरंगाबाद येथील अ‍ॅपेक्स हॉस्पिटलमध्ये ते अ‍ॅडमिट होते. या प्रकरणी नेकनूर पोलीस ठाण्याचे पोलीस उपनिरीक्षक अजय पानपाटील यांनी त्यांचा जबाब नोंदवून आरोपी रणजीत बबन गुंजाळ याच्या विरोधात कलम 307 व इतर कलमान्वये गुन्हा दाखल केला होता. या प्रकरणात चौथे सत्र न्यायाधीश जोगळेकर यांच्या कोर्टात दोषारोपपत्र दाखल करण्यात आले होते.
सदरील प्रकरणात एकूण 14 साक्षीदार तपासण्यात आले. प्रत्यक्षदर्शी आणि साक्षीदार, जखमी नितीन लोढा त्यांचा वॉचमन शिवाजी डमरे, त्यांची पत्नी सोनल लोढा, डॉ. अंजनवतीकर, तसेच नितीन लोढा यांच्या घराच्या सीसीटीव्ही फुटेज, डॉ. भावना टाकळकर, डॉ. गुळजकर, तसेच आरोपीने ज्या हॉटेवरून सत्तूर घेतला होता तो हॉटेलमालक अमोल कळासे, पीएसआय पानपाटील, एपीआय मुस्तफा शेख यांचे महत्वपूर्ण जबाब न्यायालयात नोंदविण्यात आले. आरोपी रणजीत गुंजाळ याने केलेला जीवघेणा हल्ला हा भा.दं.वि.चे कलम 307 (2) अन्वये सिद्ध झाल्याचे न्यायालयाने निरीक्षण नोंदवून आरोपी रणजीत गुंजाळ यास दोषी ठरवून जन्मठेपेची शिक्षा व पाच हजार रुपये दंड ठोठावला. सदरील प्रकरणात विशेष सरकारी वकील अ‍ॅड. मिलिंद वाघीरकर यांनी सरकार पक्षाची बाजू मांडली. त्यांना अभिषेक जोशी, पोलीस पैरवीकार सुरेश कदम यांनी सहाय्य केले तसेच अ‍ॅड. पृथ्वीराज सोंडगे व कायद्याचा विद्यार्थी अभिषेक औताडे यांनी सहकार्य केले.
