बीड ऑनलाईन रिपोर्टर:
बीड जिल्ह्यातील केज तालुक्यातील विडा गावात धुळवडीच्या दिवशी घरजावयाची गाढवावरून मिरवणूक काढण्याची अनोखी आणि जुनी परंपरा आजही उत्साहात जपली जात आहे. यंदा या पारंपरिक ‘गर्दभ स्वारी’चे मानकरी म्हणून शिवाजी गालफाडे यांची निवड झाली असून गावात त्यांच्या मिरवणुकीची जोरदार तयारी सुरू आहे.
केज तालुक्यातील डोणगाव येथील मूळ रहिवासी असलेले शिवाजी गालफाडे हे विडा गावातील बाबुराव दुनघव यांचे जावई आहेत. लग्नानंतर ते सासरवाडी विडा येथेच स्थायिक झाले असून त्यांनी येथे घर बांधून रोजंदारी करत आपला संसार उभा केला आहे. मात्र गावातील या पारंपरिक प्रथेचा मान आपल्या वाट्याला येईल, याची त्यांना कल्पनाही नव्हती.
धुळवडीच्या दिवशी सकाळी ते घरी निवांत असताना गावातील उत्साही तरुणांनी अचानक त्यांच्या घरावर धडक देत त्यांना ‘ताब्यात’ घेतले. त्यानंतर गाढवावरून मिरवणूक काढण्याच्या तयारीला सुरुवात करण्यात आली.
विडा गावात घरजावई असलेल्या व्यक्तीची गाढवावरून वरात काढण्याची परंपरा अनेक वर्षांपासून प्रचलित आहे. गावकरी या प्रथेकडे विनोदी आणि पारंपरिक उत्सवाचा भाग म्हणून पाहतात. धुळवडीच्या रंगोत्सवात हसत-खेळत हा कार्यक्रम साजरा केला जातो.
सध्या मिरवणुकीसाठी गाढव सजवण्यात आले असून ढोल-ताशा पथकही सज्ज झाले आहे. शिवाजी गालफाडे यांना रंगांनी न्हाऊ घालून, रंगांची उधळण करत तसेच गळ्यात जुन्या चप्पल-बुटांचा हार घालून गावातून मिरवणूक काढण्यात येणार आहे.
या अनोख्या सोहळ्याची गावातील नागरिक आणि तरुण आतुरतेने वाट पाहत असून धुळवडीच्या उत्साहात साजरा होणारा हा कार्यक्रम सध्या परिसरात चर्चेचा विषय ठरला आहे. दरम्यान, या परंपरेविषयी सामाजिक दृष्टीकोनातूनही चर्चा सुरू असून परंपरा, विनोद आणि सामाजिक संदेश यांचा संगम असलेली ‘गर्दभ स्वारी’ यंदाही गावकऱ्यांचे लक्ष वेधून घेत आहे.
