तहसीलदारसह न.प. प्रशासनाचा शोध सुरुच
गेवराई (रिपोर्टर) काल गेवराई शहरामध्ये धो-धो पाऊस पडल्याने चिंतेश्वर गल्लीतील नाल्याला पाणी आले होते. या नाल्यात तीन वर्षाचा बालक काल दुपारी वाहून गेला. त्याचा कालपासून शोध सुरू असून आज दुपारपर्यंत सदरील बालक सापडलेला नव्हता. तहसीलदारासह पोलीस प्रशासन, न.प.कर्मचारी व गेवराई शहरातील नागरीक मुलाचा शोध घेत आहेत.
बंटी ज्ञानेश्‍वर क्षीरसागर हा तीन वर्षीय मुलगा काल दुपारी अंगणवाडीतून घरी जात होता. चिंतेश्वर गल्लीतील ओढ्याला पाणी असल्याने या ठिकाणी त्याचा पाय घसरला व तो ओढयात वाहून गेला. कालपासून सदरील बालकाचा शोध सुरू आहे. आज दुपारपर्यंत कुठेही तो आढळून आलेला नव्हता. तहसीलदार सचीन खाडे, पोलीस प्रशासन, नगरपालिका आणि शहरातील काही नागरीक चिंतेश्वर गल्लीतील काही नागरिकांसह नदीमध्ये या बालकाचा शोध घेत आहेत.
