बीड (रिपोर्टर) हॉटेलवर काम करणार्‍या महिलेस घरी सोडून परतणार्‍या 18 वर्षीय तरुणास हटकून त्याला बेदम मारहाण केल्याची घटना परळी शहरातील एकमिनार मस्जीद परिसरात घडली. मारहाण करणारा परळी वैजिनाथ शहर पोलीस स्टेशनचा गोरे नामक कॉन्स्टेबल असून त्याच्या विरोधात काळे कुटुंबियांनी पोलिसात तक्रार देत या प्रकरणी जिल्हा पोलीस अधिक्षकांना भेटून दोषींवर कठोर कारवाई करण्याची मागणी काळे कुटुंबियांनी केली आहे.
याबाबत अधिक असे की, परळी तालुक्यातील टोकवाडी येथे काळे कुटुंबीयांचे गुरुकृपा हॉटेल आहे. रात्री सदरील हॉटेलमध्ये काम करणार्‍या महिला कर्मचार्‍याला उशीर झाला म्हणून काळे कुटुंबातील 18 वर्षीय उदय काळे हा त्यांना घेऊन परळी येथे गेला. सदरील महिला कर्मचार्‍यास घरी सोडले असता परतत असताना त्याच्या गाडीचे पेट्रोल संपले म्हणून तो एकमिनार मस्जिद परिसरातील पेट्रोल पंपाकडे पेट्रोल आणण्यासाठी निघाला. त्याच वेळी परळी शहर पोलीस ठाण्याचे गस्तीवर असलेले पोलीस त्याठिकाणी आले. यामध्ये पोलीस कर्मचारी गोरे यांच्यासह अन्य दोन कर्मचारी होते. पोलिसांनी उदय काळे यास हटकून कुठे चालला आहेस? असे विचारले असता त्याने ‘मावशीला घरी सोडायला आलो होतो’, असे उत्तर दिले. तेव्हा मद्यधूंद अवस्थेत असलेल्या या पोलिसांनी ‘मावशीला घरी सोडले की लॉजवर सोडले’, असे अपमानजनक वक्तव्य केले. तेव्हा उदय याने ‘काहीही बोलू नका,’ असे म्हणताच पो.कॉ. गोरे यांनी उदय यास बेदम मारहाण करण्यास सुरुवात केली. यामध्ये उदयच्या हाताला गंभीर दुखापत झाली असून संबंधित पोलीस कर्मचार्‍याविरोधात पोलीसात तक्रार देण्यात आली आहे. संबंधित कॉन्स्टेबलवर गुन्हा दाखल करून कठोर कारवाई करण्याची मागणी काळे कुटुंबियाने केली आहे.
मद्यधूंद पोलिसांकडून तरुणास बेदम मारहाण; पोलिसांविरुद्ध तक्रार; कुटुंब एसपींचीही भेट घेणार
