गोपीनाथगडावर हजारोंच्या संख्येने अनुयायी
ढोक महाराजांच्या हरी कीर्तनाला सुरुवात
पंकजा म्हणाल्या, ‘दरवळतो अजूनही इथं तुमच्या स्मृतीचा सुगंध, बरसतो अजूनही स्नेह अमर्त्य’ अशा नात्याचा हा बंध
परळी (रिपोर्टर): लोकनेते स्व. गोपीनाथराव मुंडे यांच्या जयंतीनिमित्त गोपीनाथ गडावर हजारो अनुयायांनी समाधीस्थळी नतमस्तक होत ‘अमर रहे अमर रहे गोपीनाथ मुंडे अमर रहे’ ‘सण्डे टू मंडे गोपीनाथ मुंडे’च्या घोषणा देत अनेकांनी लोकनेत्याच्या स्मृती जागवल्या. आज सकाळी मंत्री पंकजा मुंडे, आ. दनंजय मुंडे, खा. प्रीतम मुंडे यांच्यासह अन्य मान्यवरांनी गोपीनाथ गडावर जात स्व. मुंडे यांच्या समाधीस पुष्प अर्पण करून दर्शन घेतले. या वेळी पंकजा मुंहेंनी एक ट्विट करत ‘दरवळतो अजूनही इथं तुमच्या स्मृतीचा सुगंध, बरसतो अजूनही स्नेह अमर्त्य’ अशा नात्याचा हा बंध या ओळीतून अभिवादन केले. गोपीनाथ गडावर सध्या हरीकीर्तन सुरू आहे.
लोकनेते स्व. गोपीनाथराव मुंडे यांच्या जयंतीनिमित्त गोपीनाथ गडावर विविध सांस्कृतिक, धार्मिक कार्यक्रम आयोजीत करण्यात आले असून जयंतीनिमित्त मुंडेंचे राज्यभरातील हजारो अनुयायांनी आज भल्या सकाळपासून गोपीनाथ गडावर गर्दी करण्यास सुरुवात केली. स्व. मुंडे साहेबांच्या समाधीस्थळी जात त्याठिकाणी नतमस्तक होत अनेकांनी जुन्या आठवणींना उजाळा दिला. मंत्री पंकजा मुंडे, माजी खा. प्रितम मुंडे, आ. धनंजय मुंडे, आ. नमिता मुंदडा यांच्यासह सर्वक्षेत्रातल्या मान्यवरांनी गोपीनाथ गडावर उपस्थित रहात मुंडे साहेबांच्या समाधीस्थळी जावून पुष्पहार अर्पण केले. नतमस्तक होत अभिवादन केले.
या वेळी अनेकांनी साहेबांच्या कार्यकाळातल्या स्मृती जागवल्या. सकाळी अकरा वाजता ह.भ.प. ढोक महाराज यांच्या हरीकीर्तनाला सुरुवात झाली. या वेळी हजारोंच्या संख्येने मुंडेंचे अनुयायी त्याठिकाणी उपस्थित होते. धनंजय मुंडे हे गडावर सकाळी आले, त्यांनी समाधीस्थळी जात पुष्पहार अर्पण करत फुलं वाहत मुंडे साहेबांच्या समाधीचे दर्शन घेत अभिवादन केले. गोपीनाथ गडावर स्व. मुंडेंच्या आठवणींना एकीकडे उजाळा देत असताना दुसरीकडे अमर रहे अमर रहे, गोपीनाथराव अमर रहे च्या घोषणांनी गड दुमदुमून गेला.
