बीड (रिपोर्टर): अवैध रेती वाहतुकीविरोधात महसूल प्रशासनाने कारवाईचा धडाका लावला असून नायब तहसीलदार प्रशांत जाधवर यांच्या पथकाने केलेल्या सलग कारवायांमुळे वाळूमाफियांमध्ये चांगलीच खळबळ उडाली आहे. दोन वेगवेगळ्या कारवायांत एक हायवा आणि एक ट्रॅक्टर जप्त करण्यात आला आहे.
आज मंगळवार (दि. 13 जानेवारी) रोजी सकाळी 9 वाजण्याच्या सुमारास गोपनीय माहितीच्या आधारे नायब तहसीलदार प्रशांत जाधवर, मंडळ अधिकारी अंगद काशीद (पेंडगाव), ग्राम महसूल अधिकारी विकास ससाने (पेंडगाव) व इतर कर्मचार्यांनी उमरद जहागीर फाटा (ता. व जि. बीड) परिसरात गस्त घालत कारवाई केली. यावेळी सिरस पारगावकडून बीडकडे वाळू वाहतूक करणारा विना नंबरचा हायवा पथकाच्या निदर्शनास आला.
हायवाची तपासणी केली असता त्यामध्ये अंदाजे पाच ब्रास वाळू आढळून आली. वाहनचालक हरकिसन हरणाळ (रा. नांदूर हवेली, ता. जि. बीड) याच्याकडे गौण खनिज वाहतुकीचा कोणताही वैध परवाना नसल्याचे स्पष्ट झाले. सदर वाळू गेवराई तालुक्यातील म्हाळसपिंपळगाव येथून भरून आणल्याची माहिती चालकाने दिली. त्यामुळे अवैध वाळू वाहतूक करणारा हायवा ताब्यात घेऊन पुढील कार्यवाहीसाठी तहसील कार्यालयात जमा करण्यात आला आहे. या हायवाचा मालक ईश्वर सुखदेव (रा. म्हाळसपिंपळगाव, ता. जि. बीड) असल्याचे समजते.
यापूर्वी अवघ्या दोन दिवसांपूर्वी, दिनांक 10 जानेवारी रोजी पहाटे 3 वाजता, नायब तहसीलदार प्रशांत जाधवर यांनी मंडळ अधिकारी अनिल तांदळे (बीड), ग्राम महसूल अधिकारी दादासाहेब शेळके (शिदोड), सचिन येरांडे (बीड) व यशवंत सानप (साक्षाळपिंप्री) यांच्या पथकासह अहेर चिंचोली येथे कारवाई करत विना नंबरचा न्यू हॉलंड कंपनीचा ट्रॅक्टर एक ब्रास वाळू वाहतूक करताना पकडला होता. हा ट्रॅक्टर कामराज पवळ (रा. आहेर चिंचोली, ता. जि. बीड) यांचा असल्याचे समोर आले आहे.
दोन्ही वाहनांवर गुन्हा दाखल करण्याची प्रक्रिया सुरू असून संबंधितांवर दंडात्मक कारवाईही करण्यात येणार आहे. ही संपूर्ण कारवाई माननीय जिल्हाधिकारी बीड व माननीय उपविभागीय अधिकारी बीड यांच्या मार्गदर्शनाखाली तसेच तहसीलदार यांच्या आदेशानुसार करण्यात आली आहे. सलग कारवायांमुळे अवैध वाळू वाहतुकीविरोधात महसूल प्रशासनाचा आक्रमक पवित्रा पुन्हा एकदा स्पष्ट झाला आहे.
