मुंबई | ऑनलाईन रिपोर्टर:
मुंबईतील विधानभवन बॉम्ब किंवा क्षेपणास्त्राने उडवून देण्याची धमकी ई-मेलद्वारे मिळाल्याची धक्कादायक माहिती समोर आली असून अर्थसंकल्पीय अधिवेशन सुरू असतानाच या घटनेमुळे एकच खळबळ उडाली. धमकी मिळताच पोलिसांनी तात्काळ विधानभवन परिसराचा ताबा घेत सखोल तपासणी सुरू केली.
मिळालेल्या माहितीनुसार, आज सकाळी ६ वाजून ५७ मिनिटांनी मुंबई पोलीस आयुक्तांच्या ई-मेलवर धमकीचा संदेश प्राप्त झाला. या ई-मेलमध्ये विधानभवन बॉम्ब किंवा क्षेपणास्त्राने उडवून देण्याचा उल्लेख करण्यात आला होता. यानंतर सुरक्षा यंत्रणा तात्काळ अलर्ट मोडवर गेली.
बॉम्ब शोधक व नाशक पथक (BDDS) तसेच श्वान पथकाच्या सहाय्याने विधानभवन इमारतीची कसून पाहणी करण्यात आली. सुरक्षा तपासणीदरम्यान इमारतीतील सर्व अधिकारी व कर्मचाऱ्यांना खबरदारीचा उपाय म्हणून बाहेर काढण्यात आले होते.
विधानपरिषदेचे सभापती राम शिंदे यांनी माध्यमांशी संवाद साधत घटनेला दुजोरा दिला. “धमकी मिळाल्यानंतर पोलीस यंत्रणेने तातडीने कारवाई करत विधानभवनाची सखोल तपासणी केली. संवेदनशील ठिकाणांसह आणखी चार महत्त्वाच्या स्थळांनाही धमकी देण्यात आली आहे. संपूर्ण तपास पूर्ण झाल्यानंतरच अधिक माहिती दिली जाईल,” असे त्यांनी सांगितले.
दरम्यान, उपमुख्यमंत्री सुनेत्रा पवार यांनी सकाळी माध्यमांशी बोलताना प्राथमिक माहितीनुसार ही धमकी खोटी असल्याचे संकेत मिळाल्याचे सांगितले.
सुरक्षा तपासणी पूर्ण झाल्यानंतर विधानभवन परिसर सुरक्षित असल्याचे स्पष्ट झाले असून अर्थसंकल्पीय अधिवेशनाचे कामकाज नियोजितप्रमाणे सुरू ठेवण्यात येणार असल्याची माहिती प्रशासनाने दिली आहे.
धमकी देणाऱ्याची ओळख अद्याप समोर आलेली नसून पोलीस यंत्रणा ई-मेलचा स्त्रोत शोधण्यासाठी सायबर तपास सुरू केला आहे. संवेदनशील सरकारी ठिकाणांना लक्ष्य करणाऱ्या अशा धमक्यांमुळे राज्यातील सुरक्षा व्यवस्थेवर पुन्हा एकदा प्रश्नचिन्ह उपस्थित झाले आहे.
