बीड (रिपोर्टर): सोलापूर-बीड मार्गावरील चौसाळा शिवार परिसरात राज्य उत्पादन शुल्क विभागाने गुरुवारी (दि. 12 मार्च) धडक कारवाई करत गोव्याहून महाराष्ट्रात अवैधरित्या आणल्या जाणार्या विदेशी मद्याची मोठी तस्करी उघडकीस आणली. या कारवाईत तब्बल 51 लाख 88 हजार 520 रुपयांचा मुद्देमाल जप्त करण्यात आला असून मद्य वाहतूक करणारा ट्रक हस्तगत करण्यात आला आहे. तसेच या प्रकरणी एका आरोपीला अटक करण्यात आली आहे.
राज्य उत्पादन शुल्क विभागाला सोलापूर-बीड महामार्गावरून अवैध मद्याची वाहतूक होणार असल्याची खात्रीलायक गुप्त माहिती मिळाली होती. या माहितीच्या आधारे विभागाच्या पथकाने चौसाळा शिवार परिसरात सापळा रचून संशयित वाहनांवर नजर ठेवली. दरम्यान, संशयास्पद हालचाल आढळल्याने अशोक लेलँड कंपनीचा सहा चाकी ट्रक (क्र. चक 23 -ण 7275) थांबवून त्याची सखोल तपासणी करण्यात आली.
तपासणीदरम्यान ट्रकमध्ये माल लपवण्यासाठी विशेष पद्धतीने तयार केलेला ‘चोर कप्पा’ असल्याचे अधिकार्यांच्या निदर्शनास आले. या कप्प्याची झडती घेतली असता त्यामध्ये गोवा राज्य निर्मित आणि महाराष्ट्रात विक्रीसाठी प्रतिबंधित असलेल्या विविध ब्रँडच्या विदेशी मद्याचे 200 बॉक्स लपवून ठेवलेले आढळून आले. त्यानंतर अधिकार्यांनी मद्यासह ट्रक जप्त केला. जप्त करण्यात आलेल्या मुद्देमालाची एकूण किंमत 51 लाख 88 हजार 520 रुपये इतकी असल्याचे सांगण्यात आले.
या प्रकरणी संबंधित आरोपीविरुद्ध महाराष्ट्र दारूबंदी कायदा 1949 अंतर्गत कलम 65 (अ), (ई), 80, 81, 83, 90 व 103 अन्वये गुन्हा दाखल करण्यात आला असून पुढील तपास सुरू आहे. या मद्य तस्करीमागील इतर आरोपी किंवा साखळीचा शोध घेण्याचे कामही विभागाकडून सुरू करण्यात आले आहे.
ही कारवाई राज्य उत्पादन शुल्क आयुक्त राजेश देशमुख, संचालक (दक्षता) प्रसाद सुर्वे, उपआयुक्त (संभाजीनगर) संगीता दरेकर तसेच अधीक्षक (बीड) विश्वजीत देशमुख यांच्या मार्गदर्शनाखाली पार पडली. निरीक्षक संजय कांगणे यांच्या नेतृत्वाखाली दुय्यम निरीक्षक आर. बी. खाडगीर, तातळे, काळे, सहायक दुय्यम निरीक्षक शेख तसेच जवान काशिनाथ डुकरे, प्रशांत मस्के, अशोक नागरगोजे व इतर कर्मचार्यांनी या मोहिमेत सहभाग घेतला.
या कारवाईमुळे अवैध मद्य तस्करी करणार्यांमध्ये खळबळ उडाली असून राज्य उत्पादन शुल्क विभागाने अशा कारवाया पुढेही सुरू राहणार असल्याचा इशारा दिला आहे.
