नवर्याचं लफडं पत्नीला
समजल्यानंतर झाला होता वाद
पतीने पत्नीचा गळा दाबला
स्वत:चे हातपाय बांधून दरोड्याचा बनाव केला
बीड/पिंपळनेर (रिपोर्टर) बाहेरख्याली नवर्याचं लफडं पत्नीला समजल्यानंतर दोघात वाद झाला. संतापलेल्या पतीने आपल्या पत्नीचा गळा आवळून खून केल्याची घटना मध्यरात्री बीड तालुक्यातल्या रंजेगाव येथे घडली. सदरचा प्रकार घडल्यानंतर नवर्याने घरावर दरोडा पडल्याचा बनाव करत स्वत:चे हातपाय बांधून घेतले. पत्नीवर अत्याचार झाल्याची अफवा पेरली. अखेर पिंपळनेर पोलिसांनी अवघ्या सहा तासात या प्रकरणातील सत्य बाहेर काढत नवर्याला ताब्यात घेतले. तर ज्योतीचा मृतदेह शवविच्छेदनासाठी शासकीय रुग्णालयात आणण्यात आला आहे.
या खळबळजनक आणि धक्कादायक घटनेची अधिक माहिती अशी, पिंपळनेर पोलीस ठाण्याच्या हद्दीतील रंजेगाव येथील दिनेश आबुज आणि ज्योती आबुज हे दाम्पत्य राहते. दिनेशचे आई-वडिल देवदर्शनासाठी बाहेरगावी गेले असल्यामुळे दिनेश आणि ज्योती हे आपल्या दोन मुलांसह घरी होते. रात्री या दोघांमध्ये वाद झाला. दिनेश याचे बाहेर प्रेमसंबंध असल्याची माहिती ज्योतीला समजली. त्यामुळे दोघांमध्ये वाद झाला. या वादात संतापलेल्या दिनेशने ज्योतीचा गळा आवळून खून केला. सदरचा प्रकार हा अंगलट येईल म्हणून दिनेश याने स्वत:चे हातपाय बांधले आणि आरडाओरड केली त्यामुळे गावातील लोक जागे झाले आणि दिनेशच्या घराकडे धावले. दिनेशने त्यावेळी पाच ते सहा दरोडेखोर घरात घुसले, दरोडा टाकला आणि पत्नीला जिवे मारल्याचा कांगावा केला. या घटनेची माहिती पिंपळनेर पोलिसांना झाल्यानंतर पोलीस ठाण्याचे पीआय आघाव, पीएसआय ढाकणे यासह अन्य पोलीस पहाटेच घटनास्थळी गेले. सकाळी सात वाजेपर्यंत दिनेश हा दरोडा, लुटमार यावर ठाम होता. गावातील लोकही त्यापद्धतीने बोलत होते. मात्र लुटीची कुठलीही सकृतदर्शी घटना पहावयास मिळत नव्हती. महिलेच्या अंगावरचे दागिने तसेच होते, बळजबरीने घरात घुसल्याच्या खाणाखुणा नव्हत्या. त्यामुळे पोलिसांनी या प्रकरणी कसून चौकशी करण्यास सुरुवात केली. दरोडा आणि हत्येच्या घटनेमुळे परिसरात भीतीचे वातावरण निर्माण झाले होते. पोलिसांच्या तपासात आणि चौकशीत अखेर दिनेशनेच ज्योतीची गळा दाबून हत्या केल्याची कबुली दिली. घटनेचे गांभीर्य पाहून पोलीस उपअधिक्षक संतोष वाळके हे घटनास्थळी गेले. श्वानपथकालाही घटनास्थळी पाचारण करण्यात आले होते. पोलिसांनी दिनेशला ताब्यात घेतले आहे.
