परळीतील ज्येष्ठ पत्रकार प्रेमनाथ कदम यांची आजारपणाला कंटाळून आत्महत्या
परळी वैद्यनाथ रिपोर्टर
– परळी येथील ज्येष्ठ पत्रकार, दैनिक सूर्योदय चे प्रतिनिधी व सामाजिक कार्यात अग्रेसर असलेले व्यक्तिमत्व प्रेमनाथ कदम यांनी मंगळवारी (ता. 14) रात्री 8 च्या सुमारास आत्महत्या केली आहे. ते अनेक दिवसांपासून आजारी होते; आजारपणाला कंटाळून त्यांनी आत्महत्या केली आहे.
परळी रोटरी क्लबच्या माध्यमातून एडस जनजागृतीसाठी सायकल फेरी काढून त्यांनी सबंध बीड जिल्ह्यात काम केले होते. बेटी बचाव बेटी पढाव या अभियानातही ते सक्रिय सहभागी होते; याशिवाय अंधश्रद्धा निर्मूलन समितीचे ते सदस्य होते.
दरम्यान ज्येष्ठ पत्रकार प्रेमनाथ कदम (वय 65) यांनी परळी येथील आपल्या घरी गळफास घेतला, त्यानंतर त्यांना परळी उपजिल्हा रुग्णालयात दाखल करण्यात आले होते, मात्र डॉक्टरांनी त्यांना मृत घोषित केले. अनेक दिवसांपासून ते आजारी होते, आजारामुळे त्रस्त असल्याबद्दल त्यांनी अनेकवेळा जवळच्या मित्रांकडे आपल्या भावना व्यक्त केल्या होत्या. त्यामुळे आजारपणाला कंटाळून त्यांनी आत्महत्या केली आहे.
