सुभाष रोड, धोंडीपुर्‍यासह मुख्य बाजार पेठ रस्त्यावरील साहित्य जप्त
बीड (रिपोर्टर): बीड शहरात सातत्याने वाहतूक कोंडीला सामोरे जावे लागते. मुख्य बाजार पेठेत व्यापार्‍यांसह पुढार्‍यांच्या बॅनरने अनेक ठिकाणी अडचणी निर्माण केल्याचे चित्र पहावयास मिळत असते. ठिकठिकाणी झालेले अतिक्रमण पाहता आज शहरातील सुभाष रोड, भाजी मंडई, कारंजा रोड, धोंडीपुरासह आदी भागातले रस्त्यावरील अतिक्रमणे, बॅनर नगरपालिकेसह पोलिसांनी संयुक्त कारवाई करत काढून टाकण्यास सुरुवात केली आहे. अनेक व्यापार्‍यांचे रस्त्यावरील बॅनर, वस्तू ठेवण्यासाठी असलेले स्टँडसह अन्य साहित्य जप्त करण्यात आले.
इथून पुढचे दिवस हे सणासुदीचे आहेत. या काळात मोठ्या प्रमाणात खरेदीसाठी लोक बाहेर पडत असतात. मात्र व्यापार्‍यांसह अन्य प्रसिद्धीबाजांनी बॅनर लावून ठिकठिकाणी अडचणी निर्माण केल्या आहेत. आज बीड नगर परिषद व शहर पोलीस यांच्या संयुक्त कारवाईचा बडगा या अतिक्रमण करणार्‍यांवर उगारण्यात आला. शहरातील सुभाष रोड, भाजी मंडई, कारंजा रोड, धोंडीपुरा या ठिकाणी सतत वाहतूक कोंडी होत असल्याचे पाहून आज रस्त्यावर असेल ते बॅनर नगरपालिका आणि पोलिसांनी उचलून आपल्या ट्रॅक्टरमध्ये टाकले. त्याचबरोबर अतिक्रमण करणार्‍यांविरोधात यापुढे दंडात्मक कारवाई केली जाणार असल्याचे सांगण्यात आले.
