ऑनलाइन पटसंख्येतील कथित हेराफेरीप्रकरणी मुख्याध्यापक जोशी निलंबित; गटशिक्षण अधिकाऱ्यांसह दोघांना नोटिसा
बीड : बीड शहरातील नामांकित चंपावती शाळेतील कथित गैरप्रकार अखेर चव्हाट्यावर आले आहेत. ऑनलाइन पटसंख्या जास्त दाखवून शासनाची दिशाभूल केल्याच्या प्रकरणाची प्राथमिक चौकशी करण्यात आली. या चौकशीत दोषी आढळल्याने मराठी माध्यमाच्या शाळेचे मुख्याध्यापक सारंग जोशी यांच्यावर थेट निलंबनाची कारवाई करण्यात आली आहे. तर गटशिक्षण अधिकाऱ्यांसह अन्य दोघांना कारणे दाखवा नोटिसा बजावण्यात आल्याची माहिती आहे.
शिक्षण क्षेत्रात विश्वासाचे स्थान असलेल्या चंपावती शाळेतील या प्रकरणामुळे शैक्षणिक वर्तुळात खळबळ उडाली आहे. ऑनलाइन नोंदींमध्ये पटसंख्या वाढवून दाखविण्यात आल्याच्या आरोपांची प्राथमिक चौकशी करण्यात आली. त्यानंतर संबंधित मुख्याध्यापकांवर निलंबनाची कारवाई करण्यात आली असून, या प्रकरणात इतरांची जबाबदारी निश्चित करण्यासाठीही प्रशासनाने पावले उचलली आहेत.
गटशिक्षण अधिकाऱ्यांसह अन्य दोघांना नोटिसा बजावण्यात आल्याने या प्रकरणात पुढे कोणावर कारवाई होते, याकडे सर्वांचे लक्ष लागले आहे. शाळेतील कथित हेराफेरीची सखोल चौकशी करून शासनाची दिशाभूल झाली आहे का, तसेच या प्रकाराला जबाबदार कोण, याचा उलगडा होणे आवश्यक आहे.
चंपावती शाळेतील या प्रकरणामुळे शिक्षण विभागाच्या कामकाजावरही प्रश्नचिन्ह निर्माण झाले असून, पुढील चौकशीत आणखी कोणती माहिती समोर येते, याकडे बीडकरांचे लक्ष लागले आहे.
