आयडीयाच्या नेटवर्कचा खेळखंडोबा; दोन दिवसांपासून मोबाईल लागत नाहीत

बीड (रिपोर्टर) आयडीया कंपनीचे मोबाईल नेटवर्क नेहमीच अधूनमधून गायब असते. मात्र यात कहर म्हणजे गेल्या दोन दिवसांपासून आयडीया मोबाईलचे नेटवर्क तब्बल दोन-दोन तास बंद पडते. पुन्हा एक-दोन सेकंदासाठी येते आणि पुन्हा गायब होते. असा आयडीया कंपनीच्या नेटवर्कचा खेळखंडोबा गेल्या दोन दिवसांपासून शहरामध्ये सुरू असल्यामुळे शहरातील आयडीया कंपनीचे मोबाईल धारक संताप व्यक्त करत आहेत.
गेल्या वर्षभरापासून आयडीया कंपनीचे मोबाईल नेटवर्क अधून-मधून जात होते मात्र पुन्हा नंतर किमान एक-दोन महिने त्यामध्ये विनाव्यत्यय मोबाईलला रेंज मिळत होती मात्र दोन दिवसांपासून आयडीयाचे नेटवर्क दोन-दोन तास गायब होते. पुन्हा दोन-तीन सेकंद नेटवर्क आले की, दोन तास गायब होते. असा सतत आयडीयाच्या नेटवर्कचा लंपटडाव गेल्या दोन दिवसांपासून चालू असल्यामुळे अनेक लोकांच्या कामामध्ये व्यत्यय आलेला आहे. त्यामुळे ज्यांच्याकडे आयडीयाचे मोबाईल सीम आहे, अशा लोकांकडून या आयडीया कंपनीबद्दल तीव्र संताप व्यक्त केला जात आहे. याला कंटाळून काही लोक आयडीया मोबाईलचे सीम फेकून देतील आणि दुसर्‍या कंपनीचे सीम वापरतील याचे कंपनीला काही देणेघेणे आहे की नाही, असा संताप ग्राहकांकडून व्यक्त होत आहे.