बीड (प्रतिनिधी) – जिल्ह्यातील मांजरसुंबा ते नेकनूर या महामार्गावर आज एक भीषण अपघात घडला. भरधाव वेगाने येणाऱ्या अनियंत्रित स्कॉर्पिओने दुचाकीला पाठीमागून जोरदार धडक दिल्याने दुचाकीस्वार खाजाभाई सुलतान भाऊ सय्यद (रा. वाणगाव) यांचा जागीच दुर्दैवी मृत्यू झाला.
या घटनेमुळे संपूर्ण परिसरात हळहळ व्यक्त केली जात आहे.
मिळालेल्या माहितीनुसार, वाणगाव येथील रहिवासी असलेले खाजाभाई सुलतान सय्यद हे आपल्या दुचाकीवरून प्रवास करत होते. मांजरसुंबा–नेकनूर दरम्यान असलेल्या रस्त्यावर असताना पाठीमागून अतिवेगात आलेल्या स्कॉर्पिओ चालकाचे वाहनावरील नियंत्रण सुटले. या स्कॉर्पिओने दुचाकीला मागून जोरदार धडक दिली. धडक इतकी भीषण होती की खाजाभाई यांचा घटनास्थळीच मृत्यू झाला.
अपघाताची माहिती मिळताच परिसरातील नागरिकांनी घटनास्थळी धाव घेतली. तसेच पोलिसांना घटनेची माहिती देण्यात आली. पोलिसांनी घटनास्थळी पंचनामा करून पुढील तपास सुरू केला आहे. स्कॉर्पिओ चालकाविरुद्ध गुन्हा दाखल करण्याची प्रक्रिया सुरू असल्याची माहिती आहे.
वाणगाव गावावर शोककळा
खाजाभाई सय्यद यांच्या निधनाची बातमी वाणगाव परिसरात वाऱ्यासारखी पसरताच संपूर्ण गावावर शोककळा पसरली. त्यांच्या पश्चात पत्नी, एक मुलगा आणि एक मुलगी असा परिवार आहे. घरचा आधारवड अचानक निघून गेल्याने सय्यद कुटुंबावर दुःखाचा डोंगर कोसळला आहे. आज वाणगाव येथे शोकाकुल वातावरणात त्यांच्यावर दफनविधी करण्यात आला.
दरम्यान, या महामार्गावर वेगमर्यादा व अपघात रोखण्यासाठी कठोर उपाययोजना करण्याची मागणी नागरिकांकडून होत आहे.
