बीड (रिपोर्टर): पाईपलाईनचे काम करत असताना कंत्राटी कर्मचार्यावर गोळ्या झाडून त्याचा निर्घृणपणे खून केल्याचा खळबळजनक प्रकार काल शहरातील अंकुशनगर भागात घडला. या प्रकरणातील आरोपी फरार झाला असून त्याच्या शोधासाठी एलसीबीचे दोन आणि शिवाजीनगर ठाण्याचे एक पथक तैनात करण्यात आले. सदरील हा खून कुठल्या कारणावरून झाला हे मात्र स्पष्ट झाले नाही. मयताच्या पत्नीचा पोलिसांनी जबाब नोंदवलेला आहे. आज सकाळी जिल्हा रुग्णालयामध्ये मृतदेहाचे शवविच्छेदन करण्यात आले. आरोपी हा कुख्यात गुंड असल्याचे पोलीस प्रशासनाच्या वतीने सांगण्यात आले. त्याच्या विरोधात अनेक गुन्हे दाखल आहेत.
हर्षद शिंदे हा मजूर काल दुपारी अंकुशनगर भागामध्ये पाईपलाईनचे लिकेज् काढत होता. त्याठिकाणी विशाल सुर्यवंशी हा आला व त्याने शिंदे यांच्यावर गोळ्या झाडून त्यांचा निर्घृणपणे खून केला. दिवसाढवळ्या खुनाची घटना घडल्याने बीड शहरामध्ये एकच खळबळ उडाली होती. घटनेनंतर आरोपी विशाल सुर्यवंशी हा फरार झाला. आरोपीच्या शोधासाठी स्थानिक गुन्हे शाखेने दोन आणि शिवाजीनगर पोलीस ठाण्याने एक अश्या तीन पथकांची नियुकती केली असून हे पथक आरोपीचा शोध घेत आहे. सदरील आरोपीविरोधात यापूर्वी गंभीरस्वरुपाचे गुन्हे आहेत. मयताची पत्नी हिचा शिवाजीनगर पोलिसांनी जबाब नोंदवून घेतला. खुनाचे कारण अद्यापही अस्पष्ट असून पोलीस या प्रकरणाचा तपास करीत आहे. आज सकाळी मृतदेहाचे जिल्हा रुग्णालयामध्ये शवविच्छेदन करण्यात आले.
