बीड (रिपोर्टर) दशक्रिया विधीला जाणार्‍या पिकअपला एका वाहनाने हुलकावणी दिल्याने पिकअप पुलाला जोरात धडकले. या अपघातात पिकअपमधील 12 महिला आणि 4 पुरुष जखमी झाले. ही घटना आज सकाळी पाली जवळ घडली. जखमींना जिल्हा रुग्णालयात दाखल करण्यात आले आहे.
लक्ष्मीबाई जायभाये (रा. तेलंगसी ता. बीड) यांचे गेल्या काही दिवसांपूर्वी निधन झाले. त्यांच्या दहाव्याचा कार्यक्रम आज राक्षसभुवन येथे होता. त्यासाठी पिकअपमध्ये महिलांसह पुरुष जात असताना पिकअपला पालीजवळ एका अज्ञात वाहनाने हुलकावणी दिल्याने पिकअप चालकाचा ताबा गाडीवरून सुटला व पिकअप एका पुलाला जावून धडकला. या अपघातात अनिता जायभाये, अलका जायभाये, लताबाई फुंदे, शारदा केकाण, यशोदा मुंडे, आश्रुबाई बांगर, जनार्दन मुंडेंसह आदी जखमी झाले असून जखमींना उपचारार्थ बीडच्या जिल्हा रुग्णालयात दाखल करण्यात आले आहे.
