संतापजनक : मोटारसायकलवरील जोडप्याला अडवत जोडीदारास मारहाण तर महिलेवर बलात्कार

बीड-नगर राष्ट्रीय महामार्गावरील नांदूर विठ्ठलाच्या रस्त्यावर रात्री घडली घटना
आष्टी (रिपोर्टर): अहमदनगर येथून गावाकडे दुचाकीवरून जात असलेल्या जोडप्यांना तीन अज्ञात लोकांनी रस्त्यावर अडवून यातील महिलेच्या जोडीदारास बेदम मारहाण करत त्या महिलेवर जबरदस्तीने बलात्कार केल्याची घटना काल गुरुवारी रात्री साडे दहाच्या सुमारास घडल्याने एकच खळबळ उडाली आहे. ही घटना नांदूर (विठ्ठलाचे) रस्त्यावर घडली. मारहाणीत जखमी असलेल्या इसमास व पिडित महिलेस उपचारासाठी अहमदनगर येथील शासकीय रुग्णालयात दाखल करण्यात आले असून या प्रकरणी अद्याप गुन्हा दाखल झालेला नाही. मात्र अंभोरा पोलीस ठाण्याचे पोलीस या प्रकरणाकडे लक्ष ठेवून असून त्यांना सदरची घटना समजल्याचे पोलीस निरीक्षक ढाकणे यांनी सांगितले.

   आष्टी तालुक्यातील एका गावात राहणारे जोडपे काही कामानिमित्त काल अहमदनगर येथे गेले होते. रात्री उशिरा गावाकडे ते मोटारसायकलवर परत निघाले. बीड-नगर राष्ट्रीय महामार्गावरील नांदूर विठ्ठलाचे या रस्त्यावर अचानक अज्ञात तिघा जणांनी या जोडप्याची मोटारसायकल अडवली. यातील जोडीदारास त्या आरोपींनी बेदम मारहाण केली व सोबत असलेल्या 38 वर्षीय महिलेला रस्त्याच्या बाजुला नेत तिच्यावर बलात्कार केला. या वेळी आरोपींनी त्या व्यक्तीसह महिलेसही मारहाण केली. सदरची घटना रात्री साडे दहा वाजण्याच्या सुमारास घडल्याचे सांगण्यात येते. या घटनेची माहिती अंभोरा पोलिसांना झाल्यानंतर त्यांनी तात्काळ घटनास्थळी धाव घेतली. या घटनेतील पिडितेसह तिच्या जोडीदारास उपचारासाठी अहमदनगर येथील जिल्हा रुग्णालयामध्ये दाखल केले आहे. दुपारी दीड वाजेपर्यंत या प्रकरणी गुन्हा दाखल झालेला नव्हता. तेव्हा रिपोर्टरने अंभोरा पोलीस ठाण्याचे सहाय्यक पोलीस निरीक्षक महादेव ढाकणे यांच्याशी संपर्क साधला असता ते म्हणाले की, सदरची घटना घडलेली आहे. पिडित जोडपे गावाकडे जात असताना तीन अज्ञातांनी त्यांना मारहाण करून महिलेवर अत्याचार झाल्याचे ते सांगत आहेत. पोलीस जबाब घेण्यासाठी गेले असून नेमकी घटना काय आहे हे गुन्हा दाखल झाल्यानंतर समजेल, असे ते म्हणाले. सदरची घटना अत्यंत गंभीर असून या घटनेने आष्टी तालुक्यात खळबळ उडाली आहे.