बामणवाडीमध्ये घडली घटना
शहरात खळबळ, घटनास्थळी वरिष्ठ
पोलीस अधिकार्यांसह श्वानपथक दाखल
बीड (रिपोर्टर) घराच्या पाठीमागील बाजुवरून छतावर चढत अज्ञात चोरट्याने छतावरच्या दरवाज्याचे कुलूप तोडून आत प्रवेश करत घरामधील कपाटात ठेवलेले तीस ते चाळीस तोळे सोने नगदी एक लाख रुपये चोरून नेल्याची जबरी चोरीची घटना शहरातील बामणवाडी येथील भागीरथ मोहनलाल चरखा यांच्या निवासस्थानी घडली. या चोरीच्या घटनेने शहरात खळबळ उडाली असून घटनेची माहिती कळताच घटनास्थळी पेठबीड पोलिसांसह वरिष्ठ पोलीस अधिकार्यांनी भेट देऊन पाहणी केली. श्वान पथकालाही घटनास्थळी पाचारण करण्यात आले असून चोरांचा मागोवा काढण्यासाठी पोलीस अधिकार्यांनी यंत्रणेला सूचना दिल्या आहेत.
याबाबत अधिक माहिती अशी की, शहरातील बामणवाडी भागात भागीरथ मोहनलाल चरखा हे आपल्या कुटुंबियासोबत गेल्या अनेक वर्षांपासून राहतात. रात्री चरखा कुटुंबियांनी जेवण करून आपआपल्या खोल्यांमध्ये झोपण्यासाठी गेले. पहाटे पाच वाजण्याच्या सुमारास घरातील लोक उठल्यानंतर घरामध्ये चोरी झाल्याचे लक्षात आले. अज्ञात चोरट्यांनी चरखा कुटुंबियांच्या घराला लक्ष्य करत घराच्या पाठीमागील बाजुवरून छतावर प्रवेश केला. छतावरचा दरवाजा तोडून ते घरामध्ये आले. ज्या घरामध्ये कपाट आणि किंमती ऐवज आहे त्याठिकाणी चोरटे गेले. तेथील कपाटाचे लॉक तोडून अज्ञात चोरट्यांनी आतमधील 40 तोळे सोने आणि नगदी एक लाख रुपये चोरून ते पसार झाले. या घटनेची माहिती तात्काळ पेठबीड पोलिसांना देण्यात आली. पोलिसांनी घटनास्थळी धाव घेतली. वरिष्ठ पोलीस अधिकारी जिल्हा पोलीस उपअधिक्षक संतोष वाळके यांनी भेट देऊन घटनास्थळाची पाहणी केली. श्वानपथकाला घटनास्थळावर तात्काळ पाचारण करण्यात आले. फिंगरप्रिंट एक्सपर्ट यांनीही घटनास्थळाची बारकाईने पाहणी केली. सदरची चोरी ही कोणीतरी पाळत ठेवून केली असण्याचा प्राथमिक कयास काढला जात आहे. त्याअनुषंगाने पोलीस तपास करत आहेत. घटनास्थळी वरिष्ठ पोलीस अधिकार्यांसह पेठबीड पोलीस ठाण्याचे पालवे, बीट अंमलदार जगताप, स्थानिक गुन्हे शाखेचे पीएसआय तुपे यांच्यासह आदींनी भेट दिली.
