मुंबई (रिपोर्टर): राज्याचे अन्न व नागरी पुरवठा मंत्री तथा ओबीसी नेते छगन भुजबळ यांनी आज पुन्हा एकदा मराठा समाजाला ओबीसीत आरक्षण देण्याची मागणी करणारे मनोज जरांगे यांच्यावर हल्ला चढवला. मनोज जरांगे हे मारुतीचे शेपुट आहे ते शांत बसणार नाही, त्यांनी आता वयोवृद्ध नागरीकांनाही उपोषणाला बसण्याचे आवाहन केले आहे. यात वृद्धांच्या जिवाला काही बरेवाईट झाले तर थेट जरांगेंना जबाबदार धरा, असे आवाहन भुजबळांनी पोलिसांना केले.
मराठा आरक्षणासाठी मनोज जरांगे यांचे आंदोलन सुरू आहे. गेल्या अनेक महिन्यांपासून जरांगे विरुद्ध भुजबळ असा वाद उभ्या महाराष्ट्राने पाहिला आहे. जरांगेंनी पुन्हा एकदा सरकार विरोधात आंदोलनाचं शस्त्र उगारला असून आता ज्येष्ठांना उपोषण, आंदोलनात उतरण्याचे आवाहन केले आहे तर 24 तारखेपासून गावागावात रस्ता रोको करण्याचे आवाहन केले आहे. त्यावर छगन भुजबळ यांनी आज हल्ला चढवताना मनोज जरांगे यांना काही कळत नाही, आता त्यांनी गावबंदी करण्याचा इशारा दिला आहे. कहर म्हणजे ते वयस्कर लोकांनाही उपोषणाला बसण्याचे आवाहन करत आहेत. या नागरीकांच्या जीवाला काही झाले तर काय करायचे? असा सवाल करत भुजबळांनी सरकार सर्वच गोष्टींवर सकारात्मक विचार करत आहे, पण ते उगीचच गैरसमज निर्माण करत आहेत. ते प्रसिद्धीच्या हव्यासापोटी काहीही बरगळत आहेत. त्यांनी 10 तारखेच्या उपोषणासाठी समाजातील लोकांनाही विश्वासात घेतले नव्हते. श्रेय घेण्यासाठी ते स्वत:च उपोषणाला जावून बसले, अशी टीका भुजबळांनी केली. त्याचबरोबर त्यांना जनतेशी काही देणेघेणे नाही, असे सांगत बारस्करांनीही ही खदखद व्यक्त करून दाखवल्याचे त्यांनी म्हटले.