परळीत गर्भपाताचा खळबळजनक प्रकार पुन्हा उघड; ‘मुलगी असो वा मुलगा गर्भपात करू नका’
मातेच्या आक्रोशाकडे दुर्लक्ष;
बीड/परळी (रिपोर्टर) गर्भलिंग निदानासह गर्भपाताच्या घटनाक्रमाने दशकभरात काळवंडलेल्या बीड जिल्ह्यात पुन्हा एकदा गर्भपात करू नका, मातेच्या आक्रेशाने जिल्हा हळहळला मुलगी नको मुलगाच हवा, कुटुंबियाच्या हट्टापायी डॉक्टराला हाताशी धरून महिलेच्या गर्भाचे लिंगनिदान करत मुलगी असल्याचे लक्षात येताच एका डॉक्टराकडे गर्भपात करण्यासाठी संबंधित महिलेला नेण्यात आले. त्याठिकाणी त्या डॉक्टराने अक्षरश: गर्भ कापून बाहेर काढला. ‘मुलगी असो वा मुलगा मला गर्भपात करायचा नाही, माझ्या बाळाला मारू नका,’ असा आक्रोश करणार्या त्या मातेकडे डॉक्टरांसह कुटुंबियांनी दुर्लक्ष केलं. अखेर मातेने या प्रकरणी थेट परळीच्या संभाजीनगर पोलिसात धाव घेत पती, सासू, डॉक्टर आणि अन्य एका व्यक्तीविरोधात तक्रार दाखल केली. तिच्या तक्रारीवरून पोलिसात गुन्हा दाखल झाला असून एक जणास पोलिसांनी ताब्यात घेतले आहे.
गर्भपात आणि गर्भलिंगनिदान प्रकरणाने गेल्या दशकभरात बीड जिल्हा प्रचंड काळवंडला. जिथून गर्भपाताचे सर्वाधिक प्रकरणे बाहेर पडले, डॉ. मुंडेंसारखा राक्षस ज्या परळीत आहे तिथेच पुन्हा मातेच्या इच्छेविरोधात केवळ गर्भात मुलगी आहे म्हणून गर्भपात करण्यात आल्याची घटना उघडकीस आली. विवाहिता सरस्वती नारायण वाघमोडे (वय 22, रा. शिवाजीनगर, परळी) असे त्या पिडीत विवाहितेचे नाव आहे. सरस्वतीच्या फिर्यादीनुसार, 2020 साली तिचे लग्न नारायण अंकुश वाघमोडे याच्यासोबत झाले. नारायण परळीच्या औष्णिक विद्युत केंद्रात नोकरीवर आहे. लग्न झाल्यापासूनच पती नारायण आणि सासू छाया तिचा मारहाण, शिवीगाळ करून छळ करत. तिला माहेरी देखील बोलू देत नसत. दरम्यान, मागील वर्षी सप्टेंबर महिन्यात सरस्वतीने एका मुलीला जन्म दिला. त्यानंतर यावर्षी सरस्वती पुन्हा गर्भवती राहिली.
दुसर्यांदा गर्भवती असलेल्या सरस्वतीकडून मुलगाच हवा असा हट्ट पती आणि सासूने धरला. सोनोग्राफी करून गर्भलिंगनिदान करू आणि मुलगी असली तर गर्भपात करायचा असे ते म्हणू लागले. मात्र, मुलगा असो की मुलगी मला गर्भपात करायचा नाही असे सरस्वतीने स्पष्ट सांगितले. तिच्या बोलण्याकडे दुर्लक्ष करून पती आणि सासूने जून महिन्यात गर्भलिंगनिदानासाठी डॉ. स्वामी सोबत संपर्क साधला. डॉ. स्वामीने सोनोग्राफी मशीन घेऊन घरी येत सरस्वतीचे गर्भलिंगनिदान केले आणि मुलगी
असल्याचे सांगितले. सरस्वतीने मुलगी असली तरी पाहिजे, गर्भपात नको असे म्हणताच पतीने तिला पुन्हा मारहाण केली. जुलै महिन्यात सरस्वती आजारी पडली, तिला तापस, उलट्ट्याचा त्रास होऊ लागला. 15 जुलै सायंकाळी 5 वाजता सासुचा मेव्हणा प्रकाश कावळे हा पुन्हा डॉ. स्वामीला घेऊन घरी आला. या वेळी गर्भपाताबाबत चर्चा सुरू होती. त्यानंतर डॉ. स्वामीने सोनोग्राफी केली. तापीचे इंजेक्शन देत असल्याचे सांगून गर्भपाताचे इंजेक्शन दिले. एक ते दीड तासाने पोटदुखीचा त्रास सुरू झाला. विश्वासगाताने आपल्याला गर्भपाताचे इंजेक्शन दिचल्याचे सरस्वतीच्या लक्षात आले. तिने तात्काळ पुणे येथे राहत असलेल्या आपल्या भावाला मॅसेज करून याची माहिती दिली. ‘माझा जबरदस्तीने गर्भपात करणार आहेत तू लवकर ये’, असे भावाला सांगितले. परंतु तोपर्यंत वेळ गेलेली होती. इंजेक्शनमुळे सरस्वतीला त्रास सुरू झाला होता. 16 जुलैच्या पहाटे दीड वाजता डॉ.स्वामी पुन्हा तिच्या घरी आला, पिशवीला छिद्र करून गर्भ काढावा लागेल, असे सांगितले. त्यावेळी ‘माझा गर्भपात करू नका’, अशी विनवणी सरस्वतीने केली. तिच्या आक्रोशाकडे दुर्लक्ष करत सासुने हात पकडले आणि डॉ. स्वामीने अक्षरश: गर्भ कापून त्याचे तुकडे करून बाहेर काढला. त्यानंतर पती, सासु आणि प्रकाश कावळे यांनी गर्भाची विल्हेवाट लावली. या प्रकरणी सरस्वतीने परळीच्या संभाजीनगर पोलिसात याबाबत तक्रार दिली. तिच्या फिर्यादीवरून पती नारायण वाघमोडे, सासू छाया वाघमोडे, डॉ. स्वामी आणि प्रक्षा कावळे या चौघांविरोधात कलम 313, 315, 318, 34, 498-अ, 504, 506 अन्वये गुन्हा दाखल करण्यात आला. या प्रकरणी पोलिसांनी एका आरोपीला अटक केले आहे. या घटनेने पुन्हा एकदा बीड जिल्ह्यात खळबळ उडवून दिली आहे.
