परळी (रिपोर्टर): राज्याचे उपमुख्यमंत्री तथा बीड जिल्ह्याचे पालकमंत्री अजितदादा पवार हे आज बीड जिल्हा दौर्‍यावर आहेत. परळीपासून त्यांनी आपल्या दौर्‍याला सुरुवात केली. परळी येथे विविध विकास कामांची पाहणी करून अधिकार्‍यांची महत्वपुर्ण बैठक घेतली. या वेळी वैद्यनाथ मंदिरात दर्शन घेऊन ते विकास कामाची पाहणी करण्यासाठी आले तेव्हा अजितदादांनी कंत्राटदाराला धारेवर धरत खडेबोल सुनावले. वैद्यनाथ मंदिराच्या पायर्‍यांच्या मुद्यावरून उपमुख्यमंत्र्यांनी विचारना केली. कामाचा दर्जा सुधारण्याबाबत सक्त ताकीद देत परळी नगरपालिकेच्या मुख्याधिकार्‍यांचीही कानउघडणी केली. या वेळी दिवटे मारहाण प्रकरणातील आरोपींवर कठोर कारवाई करावी, या मागणीसाठी कार्यकर्ते बैठकस्थळी जमा झाले तेव्हा अजित दादांनी कार्यकर्त्यांचे निवेदन स्विकारत यात जे कोणी दोषी असेल त्यांच्यावर कठोर कारवाई करण्याचे निर्देश पोलीस अधिक्षकांना दिले. अजित पवारांचे परळीमध्ये जल्लोषात स्वागत करण्यात आले. वैद्यनाथ मंदिरात उपमुख्यमंत्री अजित पवार, धनंजय मुंडे, ना. पंकजा मुंडे यांनी प्रभू वैद्यनाथाला मंत्राच्या जयघोषात रुद्राभिषेक घातला. त्यानंतर महाआरती करण्यात आली.
श्रीक्षेत्र परळी वैद्यनाथ ज्योर्तिलिंग तीर्थक्षेत्र विकास आराखड्यासाठी सर्वोतोपरी सहकार्य करणार असल्याचे उपमुख्यमंत्री तथा पालकमंत्री अजित पवार यांनी आज सांगितले. विकास आराखड्यातील कामांसाठी निधी कमी पडू दिला जाणार नाही मात्र कामे दर्जेदार व गुणवत्तापूर्ण झाली पाहिजेत असे निर्देश त्यांनी यावेळी दिले.
उपमुख्यमंत्री श्री.पवार यांनी आज परळी येथे प्रभु वैद्यनाथचे दर्शन घेतले. त्यानंतर परळी येथील शासकीय विश्रामगृहातील सभागृहात त्यांनी श्रीक्षेत्र परळी वैद्यनाथ ज्योर्तिंलिंग तीर्थक्षेत्र विकास आराखड्या अंतर्गत सुरू असलेल्या कामांचा आढावा घेतला. यावेळी पर्यावरण मंत्री पंकजा मुंडे, आमदार विक्रम काळे, आमदार धनंजय मुंढे, जिल्हाधिकारी विवेक जॉन्सन, उपमुख्यमंत्री कार्यालयाचे सचिव राजेश देशमुख आदी उपस्थित होते. जिल्हाधिकारी विवेक जॉन्सन यांनी श्री क्षेत्र परळी येथील तीर्थक्षेत्र विकास आराखड्यामध्ये 92 कामांना नव्याने प्रशासकीय मान्यता देण्यात आल्याचे सांगितले. यावेळी आराखड्यानुसार करण्यात येणार्‍या कामांचे सादरीकरण करण्यात आले. तीर्थक्षेत्र विकास आराखड्यात 286.68 कोटीच्या विविध 92 कामांना मान्यता दिल्याचे त्यांनी सांगितले. दर्शन मंडपाचे काम, परिसर सुधारणा, मंदिरा भोवती दगडी फरशी, वास्तुशिल्प प्रवेशद्वार, अंतर्गत विद्युतीकरण, सौर दिवे बसविणे, उद्यान विकसित करणे, संरक्षण भिंतीचे बांधकाम, वाहनतळ यासह सुरू असलेल्या विकास कामांबाबत मुख्य वास्तुविशारद कृष्णकुमार बांगड यांनी माहिती दिली. उपमुख्यमंत्री श्री.पवार म्हणाले, श्रीक्षेत्र परळी वैद्यनाथ हे बारा ज्योर्तिंलिंगापैकी एक आहे. प्रभु वैद्यनाथाच्या दर्शनासाठी येणार्‍या भाविकांना दर्जेदार सुविधा देण्यासाठी विकास आराखड्यातील कामेही दर्जेदार होणे अत्यंत आवश्यक आहे. कामाच्या गुणवत्तेबाबत प्रत्येकाने बारकाईने लक्ष घालणे आवश्यक आहे. मंदिर परिसरातील स्वच्छता, निटनेटके पणा, सर्व सोई सुविधांयुक्त दर्शन मंडप, तसेच तीर्थक्षेत्र बालाजी, शिर्डी तसेच पंढरपूरच्या धर्तीवर भविष्यात भाविकांना सर्व सोईसुविधा देण्यासाठी राज्य शासनाकडून यासाठी निधीची कमतरता पडू दिली जाणार नाही. राज्य शासन सर्वोतोपरी सहकार्य करेल, असे त्यांनी सांगितले. मंदिराच्या मागील बाजूच्या जागेवर लाईट आणि साऊंड शो करण्यात येणार आहे. लेझर शो करताना किती वेळ शो असेल, त्यामध्ये भाविकांना कोणत्या बाबी दाखविल्या जातील यासह देण्यात येणार्‍या सेवा सुविधा दर्जेदार असायला हव्यात असे त्यांनी आवर्जून सांगितले.
यावेळी उपविभागीय अधिकारी अरविंद लाटकर, तहसिलदार व्यंकटेश मुंढे, नगर परिषदेचे मुख्याधिकारी त्रिंबक कांबळे आदी विकसीत होते.
