बीड (रिपोर्टर): ओबीसी आंदोलक मंगेश ससाणे यांच्या गाडीवर अज्ञात व्यक्तींनी दगडफेक केल्याची घटना मंगळवारी रात्री घडली. माजलगावहून धारूरकडे जात असताना विसावा हॉटेलच्या पुढे दुचाकीवरून आलेल्या दोन अज्ञातांनी त्यांच्या गाडीवर दगडफेक केली.
या हल्ल्यात ससाणे यांच्या गाडीच्या मागील व बाजूच्या काचा फुटल्या. घटनेनंतर मंगेश ससाणे यांनी तात्काळ धारूर पोलीस ठाणे गाठून घटनेची माहिती दिली. त्यांच्या तक्रारीवरून धारूर पोलीस ठाण्यात दोन अज्ञात व्यक्तींविरोधात गुन्हा दाखल करण्यात आला आहे. दरम्यान, हल्ल्यानंतर मंगेश ससाणे यांनी फेसबुक लाईव्ह करत संपूर्ण घटनेची माहिती दिली. ते पुण्याहून माजलगाव येथे आले होते. दोन महिन्यांपूर्वी पवन करवर याच्यावर झालेल्या हल्ला प्रकरणाची माहिती घेण्यासाठी त्यांनी माजलगाव ग्रामीण पोलीस ठाण्यात पोलिसांशी चर्चा केली होती. त्यानंतर परत जात असतानाच हा हल्ला झाला.
घटनेचा पुढील तपास धारूर पोलीस करीत आहेत.
