बीड | रिपोर्टर
बीड नगरपालिकेच्या निवडणुकीत आजवरचा सर्वात मोठा राजकीय चमत्कार घडत असून, मागील अनेक वर्षांपासून एकहाती सत्ता गाजवणाऱ्या क्षीरसागर घराण्याला बीडच्या मतदारांनी निर्णायक झटका दिला आहे. राष्ट्रवादी काँग्रेस (अजित पवार गट) यांच्या उमेदवार प्रेमलता पारवे यांनी तब्बल ३,७७९ मतांनी विजय मिळवत नगराध्यक्षपदावर आपले नाव कोरले. क्षीरसागर घराण्याने ठरवलेल्या उमेदवाराव्यतिरिक्त नगराध्यक्ष निवडून आल्याने ऐनवेळी भाजपमध्ये प्रवेश केलेले डॉ. योगेश क्षीरसागर आणि राष्ट्रवादी काँग्रेस (शरद पवार गट) चे आमदार संदीप क्षीरसागर या दोन्ही बंधूंना हा मोठा राजकीय धक्का मानला जात आहे.
या निवडणुकीत शेवटच्या क्षणापर्यंत श्वास रोखून धरणारा थरार पाहायला मिळाला. मतमोजणीच्या दहाव्या फेरीपर्यंत भाजपच्या डॉ. ज्योती घुम्रे आघाडीवर होत्या. मात्र अंतिम फेऱ्यांमध्ये प्रेमलता पारवे यांनी जोरदार मुसंडी मारत विजय खेचून आणला. पारवे यांना एकूण ३५,८१२ मते मिळाली, तर डॉ. ज्योती घुम्रे ३५,०३३ मतांवर थांबल्या. राष्ट्रवादी काँग्रेस (शरद पवार गट) च्या स्मिता वाघमारे यांना २५,४४० मते मिळाली.
क्षीरसागर बंधूंना मतदारांचा दणका
नगरपालिकेतील डॉ. भारतभूषण क्षीरसागर व डॉ. योगेश क्षीरसागर यांची दीर्घकाळ चाललेली मक्तेदारी संपवण्यासाठी यावेळी बीडकरांनी स्पष्टपणे परिवर्तनाची भूमिका घेतल्याचे दिसून आले. भाजपमध्ये प्रवेश करून ‘संजीवनी’ मिळवण्याचा डॉ. योगेश क्षीरसागर यांचा प्रयत्न मतदारांनी सपशेल फसवला. तर दुसरीकडे आमदार संदीप क्षीरसागर यांनी संपूर्ण ताकद लावूनही त्यांची यंत्रणा कमी पडल्याची चर्चा राजकीय वर्तुळात रंगू लागली आहे.
अमरसिंह पंडितांचा ‘बीड पॅटर्न’ यशस्वी
माजी आमदार अमरसिंह पंडित यांनी गेवराईतील आपला गड गमावला असला तरी, बीडमध्ये त्यांनी विजयाचे गणित अचूक जुळवले. प्रेमलता पारवे यांच्या पाठीशी आपली संपूर्ण संघटनात्मक यंत्रणा उभी करत त्यांनी क्षीरसागरांच्या वर्चस्वाला सुरुंग लावला, अशी राजकीय चर्चा आहे.
नगरसेवक पदाचे पक्षनिहाय बलाबल (एकूण ५० जागा)
राष्ट्रवादी काँग्रेस (अजित पवार गट) – १८
भाजप – १४
राष्ट्रवादी काँग्रेस (शरद पवार गट) – ११
शिवसेना (शिंदे गट) – ०३
शिवसेना (ठाकरे गट) – ०१
एमआयएम – ०२
काँग्रेस – ०१
एकूणच, या निकालाने बीडच्या राजकारणात नवे पर्व सुरू होत असून, घराणेशाहीला छेद देत मतदारांनी परिवर्तनाचा स्पष्ट संदेश दिला असल्याचे चित्र स्पष्ट झाले आहे.
