बीड : ऑनलाईन रिपोर्टर
मुख्यमंत्री रोजगार निर्मिती कार्यक्रम (सी.एम.ई.जी.पी.) योजनेअंतर्गत कर्जावरील अनुदानाच्या तब्बल २ कोटी ५१ लाख ५१ हजार ६९२ रुपयांच्या अपहार प्रकरणाचा तपास करताना बीड सायबर पोलीस ठाण्याने उल्लेखनीय कामगिरी बजावली आहे. अत्यंत क्लिष्ट स्वरूपाच्या या आर्थिक फसवणूक प्रकरणात तांत्रिक तपासाच्या आधारे आरोपींना अटक करण्यात आली असून, अपहारीत रकमेपैकी ८१ लाख ७८ हजार २८९ रुपये परत मिळवण्यात पोलिसांना यश आले आहे.
या प्रकरणी उद्योग सहसंचालक विभागीय कार्यालय, छत्रपती संभाजीनगर येथील अधिकारी बाळासाहेब त्र्यंबक यशवंते (वय ५४) यांनी दिलेल्या फिर्यादीवरून बीड शहर पोलीस ठाण्यात गुन्हा दाखल करण्यात आला होता. नंतर पुढील तपासासाठी हा गुन्हा सायबर पोलीस ठाणे बीडकडे वर्ग करण्यात आला.
तपासादरम्यान आरोपींनी मुख्यमंत्री रोजगार निर्मिती योजनेअंतर्गत कर्ज घेणाऱ्या लाभार्थ्यांची बनावट कागदपत्रे तयार करून बँकेच्या पोर्टल लॉगिनचा गैरवापर केल्याचे उघड झाले. या प्रकरणात भारतीय दंड संहितेच्या कलम ४२०, ४६५, ४६७, ४६८, ४७१, ४०९, ३४ तसेच आयटी ॲक्ट कलम ६६(ड) अंतर्गत गुन्हा दाखल करण्यात आला आहे.
सायबर पोलीसांनी तांत्रिक पुरावे, डिजिटल ट्रेल आणि आर्थिक व्यवहारांची सखोल तपासणी करून आरोपींचा शोध घेत त्यांना अटक केली. तसेच अपहार झालेल्या रकमेपैकी मोठी रक्कम फ्रिज करण्यात आणि काही रक्कम आरोपींकडून वसूल करण्यात यश मिळवले.
ही कारवाई पोलीस अधीक्षक बीड व अप्पर पोलीस अधीक्षक यांच्या मार्गदर्शनाखाली पोलीस निरीक्षक निलेश केळे, सहाय्यक पोलीस निरीक्षक संदीप आराक, पोउपनि स्वाती लहाने, पोहेकॉ पंचम वडमारे, भारत जायभाये, विजय घोडके तसेच महिला पोलीस अंमलदार भाग्यश्री काशिद यांनी केली.
दरम्यान, ऑनलाईन आर्थिक व्यवहार करताना नागरिकांनी सतर्क राहावे, अनोळखी लिंक, APK फाईल्स किंवा संशयास्पद संदेशांवर क्लिक करू नये, ओटीपी शेअर करू नये तसेच सोशल मीडिया खाते सुरक्षित ठेवावे, असे आवाहन सायबर पोलीस ठाणे बीडतर्फे करण्यात आले आहे.
सायबर फसवणुकीसंदर्भात तक्रार नोंदवण्यासाठी नागरिकांनी तात्काळ १९३० या हेल्पलाईन क्रमांकावर संपर्क साधावा किंवा cybercrime.gov.in या संकेतस्थळावर ऑनलाईन तक्रार दाखल करावी.
