जायकवाडीचे 18 दरवाजे चार फुटाने उघडले, सव्वा लाख क्युसेसने पाणी गोदापात्रात
गेवराई (रिपोर्टर) गेवराई – नाशिक जिल्ह्यात तसेच जायकवाडी पाणलोट क्षेत्रात होत असलेल्या जोरदार पावसामुळे जायकवाडी धरणातील पाणी साठा 98 टक्क्यांवर पोहोचला आहे. यामुळे काल शनिवार दि.17 सप्टेंबर रोजी सायंकाळी धरणाचे सर्वच 18 दरवाजे चार ङ्गुटाने उंचावून एक लाख तेरा हजार 184 क्युसेकने गोदावरी नदी पात्रात पाणी सोडण्यात आले आसून या गोदावरी नदी पात्रात एक लाख सोळा हजार क्युसेकपर्यंतचे पाणी सामावू शकते. मात्र वरून धरणात येणार्या पाण्याची आवक चालूच असून जायकवाडी पाटबंधारेकडून गोदावरी नदी पात्रातील विसर्ग आणखी वाढण्यात येणार असल्याचे सांगण्यात येत असून नागरिकांनी घाबरून जावू नये, मात्र सावधानता बाळगावी असे आवाहन गेवराईचे तहसीलदार सचिन खाडे यांनी गोदाकाठच्या ग्रामस्थांना केले आहे.
अहमदनगर व नाशिक जिल्ह्यातील धरणे ओव्हरफ्लो झाल्यानंतर वरील धरणाचे पाणी जायकवाडी धरणाकडे येत आहे. त्यातच धरण पाणलोट क्षेत्रात व नाशिक जिल्ह्यात पावसाचा जोर कमी जास्त होत असल्याने धरणात येणार्या पाण्याची आवक वाढत आहे. दरम्यान काल शनिवार दि.17 रोजी सायंकाळी व्दार 1 ते 27 असे 18 दरवाजे चार ङ्गूट उघडून धरण सांडव्याव्दारे एक लाख तेरा हजार 184 क्यूसेक पाण्याचा विसर्ग गोदावरी नदी पात्रात सोडण्यात आला आहे. तर वरून आवक चालू असल्याने हा विसर्ग वाढवण्यात येणार असून यामुळे गोदावरी नदी काठच्या गावांना सतर्कतेचा इशारा देण्यात आला आहे. दरम्यान नाशिक तसेच जायकवाडी पाणलोट क्षेत्रात पावसाचा जोर वाढल्यास पुन्हा धरणातून विसर्ग वाढण्याची शक्यता वर्तविण्यात येत आहे. त्यामुळे गोदाकाठच्या गावातील नागरिकांनी सतर्कता बाळगावी, असे आवाहन करण्यात आले आहे. गोदावरी नदी पात्रात एक लाख सोळा हजार क्यूसेक पाणी मावते परंतु जायकवाडी प्रकल्पातून एक लाख पंचवीस हजार ते दीड लाख क्यूसेक पाणी सोडण्याची शक्यता असल्याने गोदाकाठच्या गावाला पाण्याचा विळखा पडणार आहे. यामुळे जनजीवन विस्कळीत होणार असून महसूल प्रशासनाकडून खबरदारी घेतली जाणार आहे. दरम्यान राक्षभुवन व पंचाळेश्वर येथील मंदिरे पाण्याखाली गेली आसून अधिकचे पाणी सोडल्यास गोदाकाठच्या राजापूर, गंगावडी, नागझरी, सुरळेगाव या गावाला पुराचा वेढा पडण्याची शक्यता आहे. याबाबत तहसीलदार सचिन खाडे यांनी आपले प्रशासन कामाला लावले असून अनेक गावात तळ ठोकून असून नागरिकांनीही गोदापत्रातील वाढती पाणी पातळी पाहता सतर्क राहण्याचे अहवान करण्यात आले आहे.
या 32 गावांना दिला सतर्कतेचा इशारा
आगरनांदुर, संगमजळगाव, हिंगणगाव, गोंदी खु., कटचिंचोली, पांगुळगाव, सुरळेगाव, पांचाळेश्वर, राक्षसभुवन, म्हाळसपिंपळगाव, सावळेश्वर, खामगाव, राजापुर, गंगावाडी, काठोडा, नागझरी, राहेरी, बोरगावथडी, भोगलगाव, पांढरी, मिरगांव, तपेनिमगांव, ढालेगाव, श्रीपत अंतरवाला, गोपत पिंपळगाव, रामपुरी, मनुबाई जवळा, गुळज (भगवाननगर), पाथरवाला बु., गुंतेगाव, पाथरवाला खु., बोरगाव बु. या बत्तीस गावांना सावधानतेचा इशारा देण्यात आला आहे.
