गेवराई तालुक्यातील निपाणीजवळका घटनेप्रकरणी विवाहितेवर 302 चा गुन्हा दाखल
गेवराई (रिपोर्टर) गेल्या बावीस दिवसांपुर्वी लग्न झालेल्या एका तरुणाचा मृतदेह त्याच्या बेडरुममध्ये आढळून आला होता. त्यावेळेस त्याच्या सोबत त्याची पत्नी होती. पत्नीनेच बेडरुमबाहेर येऊन नातेवाईकांना पती बेशुद्ध पडल्याचे सांगितले होते. त्यानंतर रुग्णालयात नेल्यानंतर पतीला डॉक्टराने मयत घोषीत केले. ही धक्कादायक घटना 7 नोव्हेंबर रोजी रात्री तालुक्यातील निपाणीजवळका येथे घडली होती. या प्रकरणी नातेवाईकांनी सुनानेच मुलाला मारल्याचा आरोप केला होता. अखेर तपासाअंती काल गेवराई पोलिसात पत्नीविरोधात 302 चा गुन्हा दाखल केला आहे.
पोलिसांनी दिलेल्या माहितीनुसार पांडुरंग राजाभाऊ चव्हाण (वय 22, रा. निपाणीजवळका तांडा) याचे व शीतल (रा. पौळाची वाडी ता. जि. बीड) यांचे दि. 14 ऑक्टोबर 2022 रोजी पौळाचीवाडी येथे रितीरिवाजाप्रमाणे लग्न झाले होते. त्यानंतर नवरदेव मुलगा राजाभाऊ मला आवडत नाही, असे म्हणून शीतल त्याच्यासोबत सतत भांडण करत असे. दि. 7 नोव्हेंबर 2022 रोजी रात्री अकरा ते साडे अकराच्या दरम्यान हे नवदाम्पत्य आपल्या बेडरुममध्ये झोपले असता रात्री साडेअकराच्या दरम्यान शीतल बेडरुम बाहेर येऊन सासू-सासर्याला म्हणू लागली की, पांडुरंग हे गार पडले आहेत, त्यांना नातेवाईकांनी तात्काळ रुग्णालयात दाखल केले असता डॉक्टरांनी तपासून मयत घोषीत केले. या प्रकरणी सुनेनेच आमच्या मुलाला मारले आहे, असा संशय शीतलच्या सासु-सासर्याने व्यक्त केला होता. या प्रकरणी पोलिसांनी तपास करत सहा दिवसानंतर शीतलविरोधात मयत पांडुरंग यांची आई निलाबाई राजाभाऊ चव्हाण (वय 45) यांच्या फिर्यादीवरून कलम 302 भा.दं.वि.नुसार गुन्हा दाखल करण्यात आला आहे. या प्रकरणाचा पुढील तपास सहायक पोलीस निरीक्षक साबळे हे करत आहेत. गुन्हा दाखल होताच शीतलला पोलिसांनी ताब्यात घेतले आहे.
