जिल्हाधिकार्यांसह जि.प.चे सीईओंसह विविध न.प.चे मुख्याधिकारी बैठकीला उपस्थित
मुंबई/बीड (रिपोर्टर) बीड जिल्ह्यातील शहरासह ग्रामीण भागात जलजीवन मिशन अतंर्गत घराघरात पिण्याचे पाणी पोहचविण्यासाठी राज्य सरकार प्रयत्नशील असून जिल्ह्यात किती योजना अर्धवट आहेत, किती अंतिम टप्प्यात आहेत, कुठे ही योजना द्यायची याचा आढावा घेण्यासाठी राज्याचे सामाजिक न्यायमंत्री तथा बीड जिल्ह्याचे पालकमंत्री धनंजय मुंडे पाणीपुरवठा मंत्री गुलाबराव पाटील यांची महत्वपूर्ण बैठक जाली. या बैठकीला जिल्ह्यातील नगरपालिकेचे सीओ व्हिडिओ कॉन्फरन्सिंगद्वारे सहभागी झाले होते. त्यात जिल्हाधिकारी यांचाही समावेश होता. अनेक ठिकाणच्या अडखडलेल्या योजना तात्काळ सुरू करण्याबाबत या बैठकीत सांगण्यात आले.
बीड जिल्ह्यातील पिण्याच्या पाण्याच्या प्रश्नावर आज पाणीपुरवठा मंत्री यांच्यासह जिल्ह्याचे पालकमंत्री धनंजय मुंडे, जिल्हाधिकारी राधाबिनोद शर्मा, जिल्हा परिषदेचे मुख्य कार्यकारी अधिकारी अजित पवार यांच्यासह नगरपालिकेचे सीओ यांची व्हिडिओ कॉन्फरन्सिंगद्वारे महत्वपूर्ण बैठक झाली. या बैठकीत शहरासह ग्रामीण भागातील पिण्याच्या पाण्याच्या प्रश्नाचा आणि पुरवठ्याचा आढावा घेण्यात आला. परळी शहराला 24 तास पाणीपुरवठा करण्याइरादे उभारण्यात येणार्या जलकुंभासाठी जागा उपलब्ध नव्हती. या वेळी महसुलच्या अधिकार्यांनी जागा उपलब्ध करून देण्याबाबत आश्वासित केल्यानंतर पाणीपुरवठा मंत्री गुलाबराव पाटलांनी तात्काळ निधी देण्याचे आश्वासन दिले. बीड, परळी, माजलगाव, अंबाजोगाई, आष्टी, पाटोदा, शिरूर, गेवराई, धारूर, वडवणी यासह पाण्यासंदर्भातले सर्वच विभागातले महत्वाचे अधिकारी या व्हिडिओ कॉन्फरन्सला हजर होते. जिल्हाधिकारी राधाबिनोद शर्मा हे बीडमधून बैठकीस उपस्थित होते तर जिल्हा परिषदेचे सीईओ अजित पवार हे मुंबईतून बैठकीत सहभागी झाले होते. जलजीवन मिशन अंतर्गत कुठल्या गावामध्ये योजना राबवायच्या आहेत, किती गावांमध्ये योजना राबवल्या जात आहेत, कुठे काय अडचणी आहेत, रखडलेल्या योजना किती यासह अन्य महत्वाच्या पाणीप्रश्नासह अन्य बाबींवर या बैठकीत चर्चा झाली. सामाजिक न्यायमंत्री तथा बीड जिल्ह्याचे पालकमंत्री धनंजय मुंडे यांनी जिल्ह्यात घराघरात पाणी पोहचविण्यासाठी प्रयत्नांची परीकाष्ठा सुरू केली असून जलजीवन मिशन अंतर्गत कामे युद्ध पातळीवर सुरू व्हावेत, रखडलेले कामे पुर्णत्वास जावे आणि लोकांना तात्काळ पाणी मिळावे याबाबत मुंडेंनी संबंधित अधिकार्यांना सूचना दिल्या.
