बीड (रिपोर्टर) बीडहून माजलगावकडे जाणार्‍या मोटारसायकलला स्विफ्ट गाडीने जोराची धडक दिल्याने या अपघातात मोटारसायकलवरील 30 वर्षीय तरुण ठार झाल्याची घटना रात्री घाटसावळी जवळ घडली. तर दुसरा अपघात आज सकाळी गढी फाट्यावर घडला. बस आणि ट्रकची धडक झाल्याने यात पाच प्रवासी जखमी झाले. जखमींना उपचारार्थ रुग्णालयात दाखल करण्यात आले.
रफीक रशीद शेख (वय 30, रा. किनवट जि. नांदेड) हा तरुण नांदेडहून बीडला आला होता. बीडमधून तो माजलगावकडे मोटारसायकल (क्र. एम.एच. 24 बी. एम. 1625) वर जात असताना घाटसावळीजवळ त्याच्या गाडीला स्विफ्ट (क्र. एम.एच. 10 सीआर 0463) ने जोराची धडक दिली. या अपघातात सदरील तरुण ठार झाला तर दुसरा अपघात आज सकाळी गढी फाट्याजवळ घडला. मुंबईहून माजलगावकडे निघालेली एस.टी. बस (क्र. एम.एच. 20 बी.आय. 1452) आणि ट्रक (क्र. एम.एच. 44 – 4311) या दोन वाहनांची धडक झाल्याने यात शिवराज काळे, युवराज काळे यांच्यासह अन्य चार ते पाच जण जखमी झाले. जखमींना रुग्णालयात दाखल करण्यात आले आहे.
