मुंबई (रिपोर्टर) नव्या संसद भवनाच्या उद्घाटन सोहळ्याला गेलो नाही, याबद्दल मला समाधान वाटत आहे. कारण, त्याठिकाणी ज्या लोकांची उपस्थिती होती, जे काही धर्मकांड सुरु होतं, ते पाहिल्यानंतर या सोहळ्याला न जाण्याच्या निर्णयाबद्दल मला समाधान वाटले, अशी खोचक टिप्पणी राष्ट्रवादी काँग्रेसचे सर्वेसर्वा शरद पवार यांनी केली. पंडित जवाहरलाल नेहरू यांनी आधुनिक भारताची जी संकल्पना मांडली होती आणि आज संसदेत जे काही चाललंय त्यामध्ये जमीन अस्मानाचा फरक आहे. पुन्हा एकदा आपण देशाला काही वर्षे पाठीमागे नेतोय का, याची चिंता वाटायला लागली आहे. नेहरूंनी आधुनिक विज्ञानावर आधारित समाजाची संकल्पना मांडली होती, त्याच्या अगदी उलट चित्र आज संसदेत पाहायला मिळाले, असे शरद पवार यांनी म्हटले. नव्या संसद भवनाच्या उद्घाटनाला साधू, महाराज मंडळी आण्यात आली, याचे मला कौतुक वाटले, अशी उपरोधिक टिप्पणीही शरद पवार यांनी केली.
शरद पवार यांनी पत्रकार परिषदेत नव्या संसदेच्या उद्घाटन सोहळ्यावर बहिष्कार टाकण्यामागची भूमिका स्पष्ट करताना म्हटले की, संसदेच्या कोणत्याही कामाची सुरुवात राष्ट्रपतींच्या भाषणाने होते. मी राज्यसभेचा सभासद आहे, तिकडे उपराष्ट्रपती हे प्रमुख असतात. आजच्या सोहळ्यात लोकसभा अध्यक्ष दिसले, याचा आनंद वाटला पण उपराष्ट्रपतींची उपस्थिती दिसली नाही. त्यामुळे हा सगळा सोहळा मर्यादित घटकांसाठी होता, असा प्रश्न निर्माण झाल्याचे शरद पवार यांनी म्हटले.
आम्ही जुन्या संसद भवनात अनेक वर्षे काम केले आहे. त्यामुळे आम्हाला त्या वास्तूबद्दल आस्था आहे, आमची बांधिलकी जुन्या वास्तूमध्ये आहे. दिल्लीत कोणतीही नवी व्यक्ती आल्यास त्या माणसाला राष्ट्रपती भवन, संसद भवन आणि इंडिया गेट या वास्तू आवर्जून दाखवल्या जातात. या देशाचा संबंध जुन्या संसद भवनाशी जोडला गेला आहे. त्याचे महत्त्व कमी करण्याचा प्रयत्न होत आहे. हे का केले जात आहे, ते माहिती नाही. हे सगळं करायची आवश्यकता होती की नाही, याबाबत सगळ्यांशी चर्चा झाली नाही, मर्यादित वर्तुळात चर्चा करण्यात आली. आम्हाला नव्या संसद भवनाच्या उद्घाटनाबाबत काहीच माहिती नव्हते. इतकी महत्त्वाची उभारणी होत असताना त्यामध्ये सगळ्यांना सामावून घेतले असते तर चांगले झाले असते, असे शरद पवार यांनी म्हटले.
