मुंबई (रिपोर्टर): पूर्वी सरकार मतपेटीतून यायचे. मात्र, हल्ली ते खोक्यातून येत आहे, असे खोचक भाष्य करत ठाकरे गटाचे प्रमुख उद्धव ठाकरे यांनी भाजप व शिंदे गटावर जोरदार हल्ला चढवला. पक्ष बांधणीसाठी उद्धव ठाकरे सध्या विदर्भ दौर्यावर असून आज ते खासदार नवनीत राणा यांचा मतदारसंघ असलेल्या अमरावतीमध्ये आहे. येथे त्यांनी पत्रकारांशी संवाद साधला त्यानंतर ते आता कार्यकर्ता मेळाव्याला संबोधित करत आहेत.
उद्धव ठाकरे म्हणाले, सध्या लोकशाहीला गुलाम बनवण्याचा प्रयत्न केला जात आहे. मतदार माझ्यासाठी राजा आहे. मतदाराला मी गुलाम मानत नाही. आज आपला फक्त कार्यकर्त्यांचा मेळावा आहे. पण, या मेळाव्यामधील गर्दी पाहून अनेकांना सलाईन लावण्याची वेळ आली आहे.
उद्धव ठाकरे म्हणाले, माझ्यावर आरोप केला जातो की मी घरी बसून होतो. पण, मी घरी बसून कोणाची घरे फोडली नाहीत. तसेच, मला घरी बसून जे काम करता आले ते काम तुला घरे फोडूनही जमत नाहीये. सत्तेत नसूनही जनता माझ्यावर अफाट प्रेम करत आहे. मात्र, तुम्हाला गर्दी जमवण्यासाठी दारोदारी फिरण्याची वेळ आली आहे.
उद्धव ठाकरे म्हणाले, भाजपला सत्तेची मस्ती आली आहे. मात्र, त्या शक्तीचा आत्मविश्वास त्यांच्याकडे नाही. मर्दाची अवलाद असाल तर सरकारी यंत्रणा सोडून समोर या. तुम्ही राजकारणातील नामर्द आहात. फक्त अमरावतीच नव्हे तर संपूर्ण महाराष्ट्र हिंदुत्वाचा बालेकिल्ला आहे. तुम्हाला महाराष्ट्रात कुणी विचारत नव्हते तेव्हा बाळासाहेब ठाकरेंनी तुम्हाला खांद्यावर बसवून पुढे आणले आहे.
उद्धव ठाकरे म्हणाले, भाजप म्हणतो आमच्याकडे विश्वातील सर्वात लोकप्रिय, सर्वात शक्तिशाली पंतप्रधान नरेंद्र मोदी आहे. तरीही भाजपला, पंतप्रधान नरेंद्र मोदींना दुसर्यांची घरे फोडण्याची गरज का पडत आहे?
उद्धव ठाकरे म्हणाले, आतात चाय पे चर्चा नव्हे तर टपरीवर चर्चा व्हायला हवी. जिकडे जा तिकडे केवळ मोदींच्याच जाहीरातींचे फोटो दिसतात. मात्र, सर्वसामान्यांना या योजनांचा फायदा झालाच नाही. त्यामुळे कार्यकर्त्यांनी जनतेसमोर वास्तव समोर आणणे गरजेचे आहे.
उद्धव ठाकरे म्हणाले, भाजपचे निष्ठावंत आता कुणाचे ओझे उचलत आहेत. ज्या भाजपच्या निष्ठावंतांनी प्रसंगी मार खाऊन पक्ष वाढवला, त्यांच्यावरच आता विरोधकांसाठी सतरंज्या उचलण्याचे काम करावे लागत आहे. छगन भुजबळांमुळे बाळासाहेब
ठाकरेंना तुरुंगात जावे लागले, त्यांच्या मांडीला मांडी लावून आम्ही बसू शकत नाही, असे सांगत गद्दारांनी शिवसेना फोडली. मात्र, आता त्याच छगन भुजबळांच्या मांडीला मांडी लावून ते बसले आहेत. आता काय सांगणार?, असा सवाल उद्धव ठाकरेंनी शिंदे गटाला केला.
उद्धव ठाकरे म्हणाले, ज्यांना मला सोडून जायचे आहे त्यांनी जावे. पण, शिवसेनेत मी मळ देऊ येणार नाही. कोरोना असताना इतर राज्यात मृतदेह नदीत वाहत होते. त्यांच्या मृतदेहांची विटंबना होत होती. हे मी महाराष्ट्रात होऊ दिले नाही. हेच भाजपच्या पोटात दुखत आहे. यांना इतर विकासात्मक भरीव कामे करता येत नाही म्हणून आता समान नागरी कायदा समोर आणला जात आहे. जसजशा निवडणुका जवळ येतील राम मंदिराचा मुद्दा तापवला जाईल.
राईट टू रिकॉल आणावे का?
उद्धव ठाकरे म्हणाले, उद्या कुणीही दमदाटी करून व पैशाचा वापर करून देशाचा पंतप्रधान, राज्याचा मुख्यमंत्री होऊ शकतो. नागरिकांना हे फोडाफोडीचे राजकारण चालणार आहे का? अशाने देशाचा बट्ट्याबोळ होईल. त्यामुळे मतदान करताना जसा नाटोचा अधिकार मतदारांना आहे, तसेच आता निवडणुकीनंतर राईट टू रिकॉलचा अधिकार द्यावा का, यावर चर्चा करायला हवी.
लोकप्रतिनिधींना परत बोलावण्याचा अधिकार
उद्धव ठाकरे म्हणाले, लोक मोठ्या विश्वासाने एखाद्या नेत्यावर, पक्षावर विश्वास ठेवून आपले लोकप्रतिनिधी निवडतात. नंततर तेच लोकप्रतिनिधी पैशांसाठी, खोक्यांसाठी दुसरीकडे गेले तर काय करायचे? अशावेळी जनतेनेच लोकप्रतिनिधीला निवडून दिले असेल तर त्याला परत बोलावण्याचा अधिकारही जनतेला द्यावा का?, यावर चर्चा करायला हवी.
शिवसेना नाव देणार नाही
उद्धव ठाकरे म्हणाले, पूर्वी पक्ष फोडला जायचा, आता पक्षच चोरला जात आहे. हे एक नवे राजकारण भाजपने सुरू केले आहे. त्यासाठी अगदी केंद्रीय यंत्रणांचा गैरवापर केला जात आहे. आमच्या पक्षाचे नाव शिवसेना आहे आणि ते नाव मी कुठेही जाऊ देणार नाही. कारण माझ्या वडिलांनी, आजोबांनीच हे नाव पक्षाला दिले आहे.
अन्यथा निवडणूक आयोगाचे नाव बदलू
उद्धव ठाकरे म्हणाले, माझ्या पक्षाचे नाव इतरांना देण्याचा अधिकार निवडणूक आयोगालाही नाही. जे काही राजकीय पक्ष आहेत त्या निवडणुकीत काही गैरव्यवहार तर करत नाही ना? इतपत निवडणूक आयोगाचा अधिकार आम्ही समजू शकतो. पण, आमच्या पक्षाचे नाव इतरांना देण्याचा अधिकार निवडणूक आयोगाला नाही. अन्यथा, आम्ही निवडणूक आयोगाचे नाव बदलू, ते आयोगाला मान्य असेल का?
कुणाच्या खांद्यावर कुणाचे ओझे?
कुणाच्या खांद्यावर कुणाचे ओझे?, अशी गत सध्या मंत्रिमंडळ विस्ताराची झाली आहे, असा टोलाही उद्धव ठाकरे यांनी लगावला. तसेच, शरद पवारांनी शिवसेनेला भाजपपासून दूर नेले, या दाव्याचीही त्यांनी खिल्ली उडवली. उद्धव ठाकरे म्हणाले, मी रुग्णालयात आजारी होतो, तेव्हा रात्री कपडे बदलून गुप्त गाठीभेटी कोण घेत होते?
