औरंगाबाद (रिपोर्टर): बीडमधील सभा ही उत्तर सभा नसून ती उत्तरदायित्व सभा असल्याचे सांगत मराठवाड्यात दुष्काळसदृश्य परिस्थिती निर्माण झाली आहे. भविष्यात पाण्याची टंचाई भासणार आहे, त्याबाबत महत्वपूर्ण बैठक बोलवण्यात आल्याचे कृषीमंत्री धनंजय मुंडे यांनी सांगून शरद पवार यांनी केलेल्या अजित पवार यांच्याबाबतच्या वक्तव्याबाबत बोलताना मुंडे यांनी देवाने आशीर्वाद दिल्याची प्रतिक्रिया दिली.
धनंजय मुंडे हे औरंगाबाद येथे बैठकीपूर्वी पत्रकारांशी बोलत होते. तेव्हा
आमदारांची अपात्रता, हकालपट्टी आणि तुम्ही शरद पवारांची राष्ट्रीय अध्यक्ष पदावरून हकालपट्टी केल्याबाबत नेमकं सत्य काय आहे? असा प्रश्न पत्रकारांनी विचारला असता धनंजय मुंडे म्हणाले, माध्यमांना याबाबत जिथपर्यंतची माहिती आहे तिथपर्यंत ते सत्य आहे. ते काही डावलण्याला अर्थ नाही. लोकशाहीत कुणी वेगळा विचार केला म्हणजे पक्ष फुटला नाही, असं शरद पवार म्हणत असल्याचं मी ऐकलं.
शरद पवारांच्या वाक्याचा अर्थ माझ्या दृष्टीने इतकाच निघतो की, पक्षातील बहुतांश लोकांची प्रामाणिक इच्छा आहे आणि त्या इच्छेला आशीर्वाद द्यावा असं आम्ही गेली अनेक दिवस म्हणत होतो. तो आशीर्वाद आम्हाला पुन्हा एकदा देवाकडून मिळाला आहे. याचा अर्थ मी एवढाच काढतो, असं म्हणत धनंजय मुंडे यांनी शरद पवारांनी अजित पवारांबाबत केलेलं वक्तव्य आशीर्वाद आहे की राजकीय खेळी? या पत्रकारांच्या प्रश्नाला उत्तर दिलं. दुष्काळावर बोलताना धनंजय मुंडे
म्हणाले, दुष्काळाची दाहकता सर्वांना लक्षात येत आहे. मराठवाड्याच्या दोन जिल्ह्यांमध्ये अतिवृष्टी झाली आहे आणि उर्वरित जिल्ह्यांमध्ये पाऊस नसल्याने पीकं करपून चालली आहेत.
उद्या पशुधनाच्या चार्याचा प्रश्न निर्माण होणार आहे. पिण्याच्या पाण्याची टंचाई निर्माण होणार आहे. या सर्व बाबींवर हे सरकार अतिशय गंभीर आहे. मी कृषीमंत्री म्हणून, अनेक जिल्ह्यांचे पालकमंत्री दुष्काळावरील या बैठकीत सहभागी होणार आहेत, अशी माहिती धनंजय मुंडेंनी दिली. बीडमधल्या सभेबाबत बोलताना मुंडेंनी ही उत्तर सभा नसून उत्तरदायित्व सभा असल्याचे म्हटले.
