माजलगावात वारकर्‍यांचा तहसिलवर दिंडी मोर्चा
माजलगाव, रिपोर्टर : करीतो वंदन जरांगे पाटलांना…असे अभंग व मराठा आरक्षण संदर्भात घोषणा देत टाळ मृदंगांच्या गजरात शहरातुन वारकरी सांप्रदायाच्या वतीने तहसिल कार्यालयावर दिंडी मोर्चा आज दि. 17 ऑक्टोबर 2023 रोजी काढण्यात आला.
मराठा आरक्षणप्रश्नी मनोज जरांगे पाटील यांच्या समर्थनार्थ येथील सकल मराठा वारकरी सांप्रदयाच्या वतीने मोर्चा काढण्यात आला. मोर्चामध्ये आरक्षण द्या..तुम्ही आरक्षण द्या..शिंदे सरकार आरक्षण द्या, आरक्षण आमच्या हक्काचं नाही कुणाच्या बापाचं अशा मराठा आरक्षण संदर्भात विवीध घोषणा व भजन, गायन, भारूड सादर करत हा दिंडी मोर्चा शहरातील हनुमान चौक मार्गे संभाजी महाराज चौक व तहसिल कार्यालयावर धडकला. मागण्यांचे निवेदन तहसिल प्रशासनास देण्यात आले. मोर्चामध्ये सर्जेराव महाराज काशिद, महारूद्र महाराज पवार, गोपाळ महाराज नरके, दिगंबर घाडगे, कालिदास महाराज नाईकनवरे, विजय महाराज बादाडे, नवनाथ महाराज शेंडगे, सुभाष महाराज होगे यांचेसह वारकरी सहभागी झाले होते.
दिंडी मोर्चाने वेधले लक्ष
एरव्ही विवीध सांप्रदायिक कार्यक्रमांसाठी दिंडी निघते परंतु पहिल्यांदाच मराठा आरक्षण प्रश्नावर दिंडी मोर्चा येथील सर्व सकल मराठा वारकरी सांप्रदयाच्या वतीने काढण्यात आला. शासनाचे लक्ष वेधण्यासाठी हा मोर्चा काढल्याचे आंदोलकांनी सांगीतले. दरम्यान या मोर्चाने शहरवासीयांचे लक्ष वेधले.
