बीड/लातूर (रिपोर्टर): बीड लोकसभा मतदारसंघातील महायुतीच्या उमेदवार पंकजा मुंडे यांचा विजय झाला नाही तर सचिन गेला, असा व्हिडिओ करणार्या एका व्यक्तीचा अपघाती मृत्यू झाला आहे. याने एकच खळबळ उडाली असून त्या तरुणाचा मृत्यू अपघाताने झाला की त्याने आत्महत्या केली ? यावर उलटसुलट प्रतिक्रिया सोशल मिडियावर पहायला मिळत आहेत. सदरचा तरुण हा लातूर जिल्ह्यातील अहमदपूर तालुक्यातील येस्तर गावचा रहिवासी असून शुक्रवारी रात्री साडेआठच्या सुमारास सचिनचा मृतदेह बोरगाव पाटीलगत आढळून आला.
सचिन कोंडिबा मुंडे हा व्यक्ती लातूर जिल्ह्यातील अहमदपूर तालुक्यात यस्तर या गावचा रहिवासी होता. सचिन मुंडे व्यवसायाने ट्रॅक्टर चालक. लोकसभेचा निकाल लागण्यापूर्वी सचिनचा एक व्हिडिओ व्हायरल झाला होता. पंकजा मुंडे यांचा विजय झाला नाही तर सचिन गेला असा व्हिडीओ व्हायरल झाला होता. त्यानंतर आता शुक्रवारी 7 जून म्हणजेच काल रात्री साडेआठ नंतर सचिनचा मृतदेह बोरगाव पाटीजवळ आढळून आला.
अहमदपूर इथून येलदरवाडी या ठिकाणी मुक्कामाला जाणारी एसटी महामंडळाची बस नित्यनियमाने निघाली होती. बोरगाव पाटीजवळ असणार्या वळणाला बसचालकाला रस्त्यावर पडलेला इसम दिसला. घाईत बस चालकाने गाडी वळवली मात्र समोरच्या चाकापासून संरक्षण करता आलं मात्र मागील चाक सचिन मुंडे यांच्या अंगावरून गेलं. या घटनेत सचिन मुंडे यांचा जागेवरच मृत्यू झाला. याबाबतची माहिती किनगाव पोलिसांना देण्यात आली. किनगाव पोलीस घटनास्थळी दाखल झाले. मृतदेह उत्तरीय तपासणीसाठी रुग्णालयात पाठवण्यात आला आता पोलीस पुढील तपास करत आहोत.
पोलीस आणि एस टी महामंडळाच्या वाहनचालकांच्या माहितीनुसार हा अपघात आहे. मात्र सचिन मुंडे यांनी काही दिवसापूर्वी केलेला व्हिडिओ आणि आजची घटना याची सांगड घालून पंकजा मुंडे यांच्यासाठी सचिन मुंडे यांनी आत्महत्या केल्याची माहिती सोशल मीडियावर व्हायरल होत आहे. नेमकं सत्य काय याबाबत आता उलट सुलट चर्चा होत आहे
