बीड जिल्ह्यात ठाकरेंची सेना दिवाळखोरीत
बीड (रिपोर्टर): राष्ट्रवादी स्थापनेपासून शरद पवारांच्या पाठिशी खंबीरपणे उभा राहणार्या मराठवाड्यामध्ये आता शरद पवारांच्या राष्ट्रवादी काँग्रेस पक्षाचा अस्तित्वाचाच प्रश्न निर्माण झाल्याचे चित्र विधानसभा निवडणूक निकालातून समोर येत आहे तर दुसरीकडे उद्धव बाळासाहेब ठाकरे शिवसेनेचे बीड जिल्ह्यात दिवाळे निघाल्याचे चित्र स्पष्ट होताना दिसून येते. तसे शिंदे सेनेलाही बीड जिल्हा काबीज करण्यासाठी प्रयत्नांची परिकाष्ठा करावी लागणार आहे. सध्या बीड जिल्ह्यात शिंदे सेनेचे प्राबल्य म्हणावे तसे दिसून येत नाही.
लोकसभा निवडणुकीमध्ये शरद पवारांच्या राष्ट्रवादीला मराठवाड्यात आठपैकी एक जागा लढवण्यास मिळाली होती. ती जागा बीडची होती. त्या जागेवर शरद पवारांच्या राष्ट्रवादीचा खासदार निवडून आला. तत्पूर्वी 2019 च्या निवडणुकीत शरद पवारांनी मराठवाड्यामध्ये आठ जागा लढवल्या होत्या. आता 2024 च्या विधानसभा निवडणुकीत मराठवाड्यातील 46 जागांपैकी शरद पवारांच्या राष्ट्रवादीला 15 जागा मिळाल्या आणि त्या तेवढ्या ताकतीने शरद पवारांनी लढवल्या. मात्र 15 पैकी केवळ बीडची एक जागा शरद पवारांच्या गटाला जिंकता आली. त्यामुळे मराठवाड्यातील 7 जिल्ह्यांमध्ये शरद पवारांचा आता एकही आमदार नाही. ज्या मराठवाड्याने आणि ज्या बीड जिल्ह्याने शरद पवारांना गेल्या तीस वर्षांच्या कालखंडात भरभरून दिले त्या मराठवाड्यात अजित पवारांच्या राष्ट्रवादीचे पारडे आता जड होताना दिसून येत आहे. बीड जिल्ह्यात अजित पवारांच्या राष्ट्रवादीचे तीन आमदार तर मराठवाड्यात आठ आमदार निवडून आलेले आहेत. त्यामुळे मराठवाड्यातील बहुतांशी जिल्ह्यांमध्ये अजित पवारांचे नेटवर्क चांगलेच स्थिरावले आहे. त्यामुळे शरद पवारांच्या राष्ट्रवादीचा मराठवाड्यात आता अस्तित्वाचाच प्रश्न निर्माण झाला आहे. दुसरीकडे बीड जिल्हा हा भाजपाबरोबर राष्ट्रवादीचा बालेकिल्ला समजला जातो. इथे ठाकरे सेनेनेही कधीकाळी आपले प्राबल्य दोन-तीन मतदारसंघात दाखवून दिले. ठाकरेंच्या शिवसेने जिल्ह्यात दबदबाही निर्माण करून सोडला होता. आता दोन शिवसेना झाल्या, मात्र त्या दोन शिवसेनेपैकी एकाही शिवसेनेला जिल्ह्यात आपला दबदबा निर्माण करता आलेला नाही. शिंदे शिवसेनेने या ठिकाणी एकही जागा लढवली नाही. उलट त्यांच्या एका जिल्हाप्रमुखाने राजीनामा दिला. त्यामुळे शिंदे सेनेची बीड जिल्ह्यात अजूनही म्हणावी तशी पकड दिसून येत नाही. दुसरीकडे शिंदे सेनेने इथे आपले पाय रोवण्याचे मोठे प्रयत्न सुरू केल्याने ठाकरेंच्या शिवसेनेला बीड जिल्ह्यात म्हणावे तसे बळ मिळत नसल्याचे दिसून येते. कालच्या निवडणुकीत त्यांनी एक जागा लढविली मात्र ठाकरेंचा गेवराई विधानसभा मतदारसंघातला उमेदवार याठिकाणी पराभूत झाल. त्यघामुळे ठाकरेंची सेनाही बीड जिल्ह्यात दिवाळखोरीत निघाल्याचे दिसून येते.
