बीड (रिपोर्टर) पाटोदा तालुक्यातील बेलखंडी येथील जलजीवनचे काम सुरू करण्यात यावे या मागणीसाठी ग्रामस्थ जिल्हाधिकारी कार्यालयासमोर उपोषणाला बसले तर महाराष्ट्र राज्य वाहन चालक कर्मचारी संघटनेच्या वतीनेही विविध मागण्यांसाठी धरणे आंदोलन करण्यात आले. जिल्ह्यातील वक्फ बोर्ड जमीन घोटाळ्यातील प्रकरणाची चौकशी करण्यासाठी अधिकारी बदलल्याच्या निषेधार्थ होमहवण आंदोलन करण्यात आले. या सर्व आंदोलनांमुळे जिल्हाधिकारी कार्यालयाचा परिसर दणाणून गेला होता.
बीड जिल्ह्यातील देवस्थानाच्या जमीनी अनेकांनी हडपलेल्या आहेत. या प्रकरणी काही जणांवर गुन्हेसुद्धा दाखल झालेले आहेत. या प्रकरणाचा तपास करण्यासाठी उच्च अधिकार्याची नियुक्ती करण्यात आली होती. मात्र तपासी अधिकारी बदलून जमीन घोटाळा प्रकरणाचा तपास आता डीवायएसपीमार्फत करण्यात येणार असल्याने याच्या निषेधार्थ काही सामाजिक कार्यकर्त्यांनी जिल्हाधिकारी कार्यालयासमोर होमहवण आंदोलन केले. हे आंदोलन ढवळे यांच्या नेतृत्वाखाली झाले. दुसरे आंदोलन महाराष्ट्र राज्य 102 वाहन चालक कर्ममचारी संघटनेच्या वतीने करण्यात आले.
या संघटनेने आपल्या विविध मागण्या प्रशासनाकडे निवेदनाद्वारे दिलेले आहे. मात्र याची दखल प्रशासन घेत नसल्याने संघटनेच्या वतीने आमरण उपोषण सुरू आहे. पाटोदा तालुक्यातील बेलखंडी येथील जलजीवनचे काम बंद करण्यात आलेले आहे हे काम सुरू करण्याची मागणी ग्रामस्थांच्या वतीने करण्यात आली आहे. सौ. विठाबाई मारुती वनवे यांच्यासह आदी नागरिक जिल्हाधिकारी कार्यालयासमोर आंदोलन करत आहेत. एकूणच या सर्व आंदोलनांमुळे जिल्हाधिकारी कार्यालयाचा परिसर दणाणून गेला आहे.