फडणवीसांच्या बीड दौर्याने पंकजांच्या भाजपातील अस्थिरतेवर जोरदार चर्चा
बीड (रिपोर्टर) माजी मंत्री पंकजा मुंडेंना वेगवेगळ्या पक्षांचे आमदार आपल्या पक्षात येण्याबाबत निमंत्रण देत असतानाच उपमुख्यमंत्री देवेंद्र फडणवीस हे मात्र बीड जिल्ह्यावर खास लक्ष ठेवून असल्याच्या घटना घडताना दिसून येत आहे. उद्या गहिनीनाथ गडावरील पुण्यतिथीच्या कार्यक्रमाला मुख्यमंत्री एकनाथ शिंदेंसह उपमुख्यमंत्री देवेंद्र फडणवीस उपस्थिती दर्शविणार आहेत. गेल्या पंधरा दिवसात उपमुख्यमंत्र्यांनी दोन वेळेस बीडला येऊन त्यांचे बीडकडे खास लक्ष असल्याचे दाखवून दिले तर दुसरीकडे माजी मंत्री पंकजा मुंडेंसह खा. प्रितम मुंडे या भाजपाचे वरिष्ठ नेते बीडमध्ये आले तरी त्यांच्या कार्यक्रमामध्ये सहभाग नोंदवत नसल्याने पंकजा मुंडेंच्या नाराजीवर आता उघड चर्चा होताना दिसून येत आहे.
उपमुख्यमंत्री देवेंद्र फडणवीस आणि माजी मंत्री पंकजा मुंडे यांच्यातील अंतर्गत राजकीय वाद सर्वश्रूत आहे. पंकजा मुंडे यांना भाजप सातत्याने डावलत असल्याने त्या नाराज असल्याच्या चर्चाही होत आहेत. विविध पक्षांचे आमदार त्यांना आपल्या पक्षाचे दार उघडे असल्याच्या जाहीर प्रतिक्रिया देत निमंत्रित करीत आहेत. काल-परवाच शिवसेनेच्या आमदारांनी मातोश्रीचे दार पंकजा मुंडेंसाठी सताड उघडे असल्याचे म्हटले तर आज माजी मुख्यंमत्री तथा काँग्रेसचे नेते अशोक चव्हाण यांनी पंकजा मुंडे अत्यंत हुशार आहेत, कर्तबगार आहेत, त्यांना माहित आहे, कुठल्या घोड्यावर बसायचे, अशी प्रतिक्रिया देऊन पंकजा मुंडेंच्या भाजपातील अस्थिरतेबाबतच्या चर्चेला हवा दिली. तर इकडे उपमुख्यमंत्री देवेंद्र फडणवीस बीडवर खास लक्ष ठेवून असल्याच्या घडामोडी घडत आहेत. 1 जानेवारीला स्व. विनायक मेटेंच्या आयोजीत कार्यक्रमाला देवेंद्र फडणवीसांनी उपस्थिती दर्शविली तर उद्या 15 जानेवारीला बीड जिल्ह्यातल्या श्री संत वामनभाऊ यांच्या पुण्यतिथी निमित्त गहिनीनाथ गडावर आयोजीत कार्यक्रमाला उपस्थिती दर्शविणार आहेत. त्यासाठी गहिनीनाथ गडावर दोन हेलिपॅड तयार करण्यात आले असून वरिष्ठ पोलीस अधिकारी गडावर तळ ठाकेून आहेत. देवेंद्र फडणवीसांचे बीडवरचे लक्ष पाहता पंकजा मुंडेंच्या भाजपातील अस्थिरतेवर शिक्कामोर्तब होत त्याबाबत चर्चा होताना दिसून येत आहे. पंकजा मुंडे अथवा प्रितम मुंडे भाजपाचे वरिष्ठ नेते बीडमध्ये आल्यानंतर त्याकडे पाठ फिरवताना पहावयास मिळत आहे. काल भाजपाच्या महिला प्रदेशाध्यक्षा चित्रा वाघ बीडमध्ये आल्या असतानाही पंकजा मुंडेतर सोडा प्रितम मुंडेही उपस्थित राहिल्या नाहीत.
अॅडिशनल एसपींकडून गहिनीनाथ गडावर पाहणी पोलिसांचा चोख बंदोबस्त
आष्टी (रिपोर्टर) :- एकविसाव्या शतकामध्ये अंधश्रद्धा निर्मूलन करणारे बीड जिल्ह्यातील एक महान तपस्वी संत म्हणून अशी ओळख असणारे वैराग्यमुर्ती वामनभाऊ महाराज यांच्या 47 व्या पुण्यतिथी सोहळ्यानिमित्त श्री क्षेत्र गहिनीनाथ गड येथे लाखोच्या संख्येने वारकरी दाखल होत असतात या सोहळ्याला राज्याचे मुख्यमंत्री एकनाथ शिंदे, उपमुख्यमंत्री देवेंद्रजी फडणवीस यांच्या सह अनेक राजकीय नेते हजेरी लावणार असल्याचे बोलले जात आहे.हेलिपॅड ही करण्यात आले असून अॅडिशनल एसपी यांनी आज दुपारी 1 वाजता पाहणी करुन पोलिसांचा कडेकोट बंदोबस्त तैनात करण्यात आला आहे.
लाखो भाविकांचे श्रध्दास्थान असलेल्या संत वामनभाऊ महाराज यांच्या गहिनीनाथ गडावरील पुण्यतिथी निमित्त दि.15 जानेवारी रोजी या सोहळ्यासाठी दिंड्या गडावर आज सायंकाळी पोहचतील उद्या सकाळी 9 वाजता किर्तन व 1 च्या नंतर महाप्रसाद होईल पुण्यतिथी निमित्त परिसरातील भाविक टाळ मृदुंग, पथाका, घेऊन गडाच्या दिशेने दिंड्या रवाना झाल्या आहेत. या सोहळ्यासाठी राजकीय, सामाजिक, धार्मिक क्षेत्रातील मान्यवर मोठ्या संख्येने उपस्थित राहणार आहेत. लाखो संख्येने राज्य भरातून भाविक भाऊंच्या चरणी नतमस्तक होत असतात.
