राष्ट्रवादी आणि घड्याळ गायब!
पुणे (रिपोर्टर): राष्ट्रवादी काँग्रेसचे बडे नेते आणि विधानसभेचे विरोधी पक्षनेते अजित पवार यांच्या भाजपच्या कथित जवळीकवरून गेल्या काही दिवसांपासून राज्यातील राजकारण कमालीचे तापले आहे. मात्र अजित पवार यांनी भाजपसोबत जाण्याच्या सगळ्या चर्चांवर पूर्णविराम लावला आहे. तरीही चर्चा काही थांबण्याचे नाव घेत नाही.
एका वृत्तपत्राच्या कार्यक्रमात अजित पवारांनी ’मुख्यमंत्री व्हायला नक्कीच आवडेल’ असे विधान काल केल्यानंतर या चर्चांना पुन्हा पेव फुटला आहे. त्यातच आता पुण्यातील कोथरूड भागात ’जनतेच्या मनातील मुख्यमंत्री’ असा उल्लेख असलेला बॅनर लागल्याने या चर्चांना अजूनच हवा मिळाली आहे.
राष्ट्रवादी काँग्रेसचे दिग्गज नेते आणि विरोधी पक्षनेते अजित पवार यांनी पुण्यात मोठे वक्तव्य केले आहे. ’राष्ट्रवादी काँग्रेस आताही मुख्यमंत्रीपदावर दावा ठोकू शकते. यासाठी 2024च्या निवडणुकांची वाट पाहण्याची गरज नाही’, असे अजित पवार म्हणाले आहेत. अजित पवार यांचे हे वक्तव्य येताच पुण्यातील कोथरूड भागात ’जनतेच्या मनातील मुख्यमंत्री, महाराष्ट्राच्या राजकारणाचा केंद्रबिंदू’ अशा आशयाचे बॅनर लागल्याने पुन्हा चर्चा सुरू झाल्या आहेत. अजित पवार यांच्या समर्थक दीपाली डोख यांनी हे बॅनर लावले आहे. मात्र या बॅनरवरून राष्ट्रवादी पक्षाचा उल्लेख आणि घड्याळ चिन्ह गायब झालेले दिसत आहे. गेल्या काही दिवसांपासून राज्याचे राजकारण अजित पवार यांच्या भोवती फिरत आहे. अजित पवार आधी नॉट रिचेबल झाल्याने तर्कांना उधाण आले होते. त्यानंतर सामाजिक कार्यकर्त्या अंजली दमानिया यांनी ट्विट करून अजित पवार हे भाजपसोबत जाणार असल्याचा दावा केला होता. त्यामुळे अजितदादा हे भाजपसोबत जाणार असल्याच्या चर्चांना उधाण आले होते. या वृत्तात काहीही तथ्य नसल्याचे राष्ट्रवादीचे सर्वेसर्वा शरद पवार यांनी स्पष्ट केले होते. अजित पवार यांनीही या अफवा असल्याचे सांगत चर्चांना पूर्णविराम दिला होता. तरीही असे बॅनर का लावले जात आहेत? यावरून शंका उपस्थित केली जात आहेत. यामुळे अजित पवारांच्या भूमिकेकडे अजूनही सर्वांचे लक्ष आहे.
जनतेच्या मनातील मुख्यमंत्री, पुण्यात लागले अजित पवारांचे बॅनर
