ईद मिलापच्या कार्यक्रमाला उत्स्फूर्त प्रतिसाद; विविध पक्ष-संघटनेच्या नेते-पदाधिकार्यांकडून कागदेंना सत्तेत आणण्याचा सूर
बीड (रिपोर्टर) राजकारणाबरोबर समाजकारणाला महत्व देत हिंदू-मुस्लिम समाज बांधवांना एकत्रित करत भाईचारा कायम ठेवण्याचे काम पप्पू कागदे हे सातत्याने करत आलेले आहेत. गेली अनेक वर्षे चळवळीत काम करणार्या या माणसाला सत्तेत आणणे गरजेचे आहे. अशा वेळी आपण सर्व एकत्रित येऊन पप्पू कागदे यांना आमदार करू, त्यासाठी शिष्टमंडळ घेऊन त्यांच्या पक्षाच्या वरिष्ठांकडे जाऊ, असे म्हणत माजी आ. सुरेश नवले यांनी पप्पू कागदेंना आमदार करण्यासाठी पुढाकार घेतला.
ते बशीरगंज येथे आयोजीत रिपाइंच्या ईद मिलाप कार्यक्रमामध्ये बोलत होते. या वेळी उद्धव सेनेचे जिल्हाप्रमुख अनिल जगताप, मोईन मास्टर, फारुक पटेल, मौलाना जाकीर, अॅड. सुभाष राऊत, शफीक भाऊ, बाळासाहेब राख, सुशिलाताई मोराळे, सिराज देशमुख, विजयराजे पंडित, रिपोर्टरचे संपादक शेख तय्यब यांच्यासह आदी मान्यवर उपस्थित होते.
रिपाइंचे पप्पू कागदे यांच्या वतीने आज बशीरगंज येथे ईद मिलापचा कार्यक्रम आयोजीत करण्यात आला होता. या वेळी उपस्थित मान्यवरांनी पप्पू कागदे यांच्या आजपर्यंतच्या कार्यप्रणालीचे राजकारणासह समाजकारणाचे आणि सर्वसामान्यांसोबतच्या न्यायिक कर्माचे कौतुक करत पप्पू कागदे यांना आमदार करूच, असा सूर लावला. उपस्थितांपैकी सर्वांनीच पप्पू कागदे यांना एकदा सत्तेत आणा, त्यांना आमदार करा, अशा स्वरुपाचे भाषण केल्यानंतर सरशेवटी माजी आमदार सुरेश नवले यांनी पप्पू कागदेंना आमदार करण्यासाठी आपण पुढाकार घेऊ, असे म्हणत उपस्थित मान्यवरांच्या म्हणण्याची दखल घेतली. पप्पू कागदे हे गेल्या अनेक वर्षांपासून राजकारणाबरोबर समाजकारण करत आलेले आहेत. सर्वसामान्यांच्या प्रश्नांवर ते सातत्याने आवाज उठवत आलेले आहेत. हिंदू-मुस्लिम समाज बांधवांना एकत्रित ठेवण्याचे काम त्यांनी अनेक वेळा केले आहे. ईद मिलाप सारख्या कार्यक्रमातून समतेच्या व शांततेच्या मार्गाने सर्वधर्मिय समाज बांधवांच्या माध्यमातून सामाजिक, एकता व एकोपा वाढवण्याचे काम ते करतात हे सांगण्याची गरज नाही. अशा तडफदार आणि सर्वांना सांभाळून घेणार्या नेतृत्वाला सत्तेत आणणं महत्वाचे आहे. सर्व पक्षांची मोट बांधून ते पप्पू कागदे यांच्या पाठिशी उभा करण्यासाठी आपण पुढाकार घ्यायला तयार आहोत, एक शिष्टमंडळ घेऊन त्यांच्या पक्षाच्या वरिष्ठांकडे जायला तयार आहोत, असे सुरेश नवलेंनी म्हटले. ईद मिलापच्या कार्यक्रमामध्ये बहुतांशी पक्ष-संघटनेच्या नेत्यांनी पप्पू कागदेंना आमदार करण्याबाबत सुतोवाच केल्याने प्रा. सुरेश नवले यांनी सर्वांची मोट बांधण्याबाबत पुढाकार घेतल्याचे स्पष्ट केले.
