राष्ट्रवादीत फूट नाही, अजित पवार आमचेच नेते शरद पवारांच्या वक्तव्याने खळबळ

बारामती (रिपोर्टर): राष्ट्रवादीत फूट नसून अजित पवार आमचेच नेते आहेत, असे वक्तव्य राष्ट्रवादीचे अध्यक्ष शरद पवार यांनी बारामतीत बोलताना केले आहे. त्यांच्या या वक्तव्याने राजकीय वतुर्ळात चर्चेला उधाण आले आहे. ते (अजित पवार) आमचे नेते आहेत. आमच्यात वाद नाही. राष्ट्रवादीत फूट नाही. पक्षात फूट कधी पडते? जेव्हा राष्ट्रीय स्तरावर एखादा मोठा गट पक्षापासून वेगळा होतो तेव्हा असे घडते. मात्र राष्ट्रवादीत आज तशी परिस्थिती नाही. काही नेत्यांनी वेगळी भूमिका घेतली पण याला फूट म्हणता येणार नाही. लोकशाहीत ते असे करू शकतात, असे म्हणत शरद पवार यांनी अजित पवारांच्या भूमिकेचे एकप्रकारे समर्थनच केले आहे.

अजित पवार यांनी भाजपासोबत वेगळी चूल मांडली तेव्हापासून राष्ट्रवादीचे कार्यकर्तेच नाही तर जनताही या पक्षातील नेत्यांच्या विधान आणि भूमिकांमुळे संभ्रमात आहे. त्यात अलीकडेच अजित पवार हे आमचे नेते आहेत. राष्ट्रवादीत फूट पडली नाही, असे वक्तव्य राष्ट्रवादीच्या खासदार सुप्रिया सुळे यांनी केले होते. आता या वक्तव्याला दुजोरा देणारे वक्तव्य शरद पवार यांनीही केले आहे.
बारामतीत पत्रकारांशी बोलताना
ते म्हणाले की, अजित पवार यांनी वेगळा निर्णय घेतला म्हणून फूट पडली नाही. कुणाला कोणता वेगळा निर्णय घ्यावा लागला तर तो लोकशाही नुसार त्याचा अधिकार आहे. शरद पवारांच्या या विधानाने एकूणच संभ्रमाचे वातावरण निर्माण झाले आहे. शरद पवार आज सातारा जिल्ह्यातील दहिवडीत सकाळी पवारांची जाहीर सभा आहे तर संध्याकाळी 4 वाजता कोल्हापुरात त्यांची सभा होणार आहे.

पवारांच्या वक्तव्यानंतर
कोण काय म्हणाले…
शरद पवार मोठे नेते आहेत आणि त्यांच्या बोलण्याचा अर्थ काय आहे हे तेच सांगू शकतील. कदाचीत त्यांना पक्षाची काळजी असेल, निवडणूक आयोग आणि न्यायालयात प्रकरण सुरू असताना मी पक्षाचा अध्यक्ष आहे आणि पक्षात फूट नाही, असं सांगणं त्यांच्या रणनीतीचा भाग असू शकतो.
-विजय वडेट्टीवार
काँग्रेस

निवडणूक आयोगासाठी तसेच पक्षाची घटना आणि नेतृत्व वाचवण्यासाठी शरद पवारांनी वक्तव्य केले असावे, असे माझे व्यक्तिगत मत आहे, पण शरद पवार यांच्या विधानामुळे नेतृत्वात नाही, कार्यकर्ता आणि जनतेत संभ्रम निर्माण होत असतो हे सत्य आहे, हे नाकारता येणार नाही. शरद पवार यांच्या विधानाने संभ्रम निर्माण होतोय.
अंबादास दानवे
शिवसेना

असे वक्तव्ये करून शरद पवार अजितदादांना त्यांच्या सोबत घेतील. पवार साहेब मोठे नेते आहेत, अजित पवार यांची पुन्हा घर वापसी होईल, अशा वक्तव्यांमुळे राष्ट्रवादी कार्यकर्त्यांमध्ये संभ्रम निर्माण होत आहे. तो संभ्रम शरद पवार यांनी दूर करावा.
नाना पटोले
काँग्रेस