लोकसंख्या, मतदारांच्या आकडेवारीत तफावत

मतदारांसह भावी नगरसेवक गोंधळले

बीड (रिपोर्टर): नगर पालिका प्रशासनाने मतदार यादी प्रसिद्ध केली, या यादीमध्ये अनेक चुका झाल्या असून एकाच कुटुंबातल्या काही सदस्यांची नावे एका वार्डात तर काही सदस्यांची नावे दुसर्‍या वार्डात टाकण्यात आली आहेत. तर दुसरी महत्त्वाची बाब म्हणजे काही वार्डात लोकसंख्या कमी मात्र मतदारांची संख्या जास्त दाखवण्यात आली आहे. या प्रकारामुळे मतदारासह भावी नगरसेवक चांगलेच गोंधळले आहेत. या सर्व चुकाबाबत आक्षेप नोंदवण्याची तारीख नगर पालिकेने जाहीर केलेली आहे. या आक्षेपात किती तक्रारी दुरूस्त होतात याकडे लक्ष लागून आहे.

नगर पालिका प्रशासनाच्या निवडणूका येत्या काही दिवसांवर घेण्यात येणार असल्याने मतदार यादी प्रसिद्ध करण्यात आली. बीड शहरामध्ये एकूण 26 प्रभाग आहेत. मतदार याद्यामध्ये अनंत चुका असल्याचे दिसून आले. एकाच कुटुबातील अनेक मतदारांची नावे एका वार्डात तर काहींची नावे दुसर्‍या वार्डात, त्याच बरोबर एका वार्डातील रहिवाशांची नावे दुसर्‍या वार्डात समाविष्ट करण्यात आली आहेत. दुसरी महत्त्वाची बाब म्हणजे लोकसंख्या आणि मतदार या आकड्यामध्ये  मोठी तफावत आहे. प्रभाग क्र. 5, 6 आणि 8 यात लोकसंख्या कमी आणि मतदारांची संख्या जास्त आली याबाबत नगर पालिकेचे सिओ ढाकणे यांच्याशी संपर्क साधला असता ते म्हणाले की, 2011 च्या लोकसंख्येनुसार मतदार यादी तयार करण्यात आली असल्याचे सांगितले आहे. दरम्यान या प्रकारामुळे मतदारासह भावी नगरसेवक चांगलेच गोंधळले आहेत.

प्रभाग  क्र. लोकसंख्या  मतदार

1      7654              3843
2     8438              5023
3     7242                 5951
4     7443                  6830
5    7186                 8111
6     8198              9609
7    8319              6193
8    7563            8511
9     8296             6579
10   8228           5410

11  8367          5440
12  8436           6828
13  8446         7095
14   8298        6154
15   7239         6665
16  8172         4184
17  8268         6987
18   8166        7430
19   7273       7477
20   7263       5565
21   7385       4359
22   7142        3363
23   7348      6068
24  7198         5167
25   7260       3259
26  7702      4590